ആരോഗ്യ മേളയിലും എം.എൽ.എയെ ബഹിഷ്കരിച്ച്​ ട്വന്‍റി20

കോലഞ്ചേരി: ആരോഗ്യ മേളയിലും എം.എൽ.എയെ ബഹിഷ്കരിച്ച് ട്വന്‍റി20. ബഹിഷ്കരണത്തിനെതിരെ പ്രതിഷേധമറിയിച്ച് എം.പിയും ജില്ല പഞ്ചായത്ത് പ്രസിഡന്‍റും. വടവുകോട് ബ്ലോക്ക്തല ആരോഗ്യ മേളയിലാണ് നാടകീയരംഗങ്ങൾ അരങ്ങേറിയത്. പി.വി. ശ്രീനിജിൻ എം.എൽ.എ വേദിയിലെത്തിയതോടെ ചടങ്ങിൽ അധ്യക്ഷത വഹിക്കേണ്ട ബ്ലോക്ക് പ്രസിഡന്‍റ്​ റസീന പരീത് അടക്കമുള്ളവർ വേദി വിടുകയായിരുന്നു. ട്വന്‍റി20 അംഗങ്ങളുടെ നടപടിയെ ഉദ്ഘാടകനായ ബെന്നി ബഹനാൻ എം.പിയും തുടർന്ന് സംസാരിച്ച ജില്ല പഞ്ചായത്ത് പ്രസിഡന്‍റ്​ ഉല്ലാസ് തോമസും രൂക്ഷമായി വിമർശിച്ചു. രാഷ്ട്രീയ അഭിപ്രായ വ്യത്യാസങ്ങൾ പൊതുപരിപാടികളിലേക്ക് വലിച്ചിഴക്കുന്നത് ഭൂഷണമല്ലെന്നായിരുന്നു എം.പിയുടെ പ്രതികരണം. വിളിച്ചുവരുത്തി അപമാനിക്കുന്നതിന് തുല്യമാണ് ബ്ലോക്ക് ഭരണസമിതിയുടെ നടപടിയെന്ന് ജില്ല പഞ്ചായത്ത് പ്രസിഡന്‍റും പറഞ്ഞു.