കൊച്ചിയിലെ വഴിയോരക്കച്ചവടം: 1350 പേർക്ക്​ കൂടി ലൈസൻസും തിരിച്ചറിയൽ കാർഡും

കൊച്ചി: താൽക്കാലിക സർട്ടിഫിക്കറ്റ് ലഭിച്ച 1350 പേർക്ക്​ കൂടി കൊച്ചി നഗരത്തിൽ വഴിയോരക്കച്ചവടം നടത്താൻ ലൈസൻസും തിരിച്ചറിയൽ കാർഡും നൽകാൻ ഹൈകോടതി നിർദേശം. ഇതുവരെ നഗരസഭ ടൗൺ വെൻഡിങ്​ കമ്മിറ്റിയുടെ പരിഗണനക്കെത്തിയ അപേക്ഷകളിൽ ഉചിതമായ പരിശോധന നടത്തി രണ്ടു മാസത്തിനകം നിയമപരമായ നടപടിയെടുക്കാനും ജസ്റ്റിസ് എ.കെ. ജയശങ്കരൻ നമ്പ്യാർ നഗരസഭക്ക്​ നൽകിയ ഉത്തരവിൽ പറയുന്നു. കൊച്ചി നഗരത്തിലെ തെരുവ്​ കച്ചവടക്കാരെ പുനരധിവസിപ്പിക്കണമെന്നും അനധികൃത വഴിയോരക്കച്ചവടക്കാരെ ഒഴിപ്പിക്കണമെന്നുമാവശ്യപ്പെടുന്ന ഒരു കൂട്ടം ഹരജികളിലാണ് ഉത്തരവ്​. നേത്തേ 1274 പേർക്ക്​ ​ലൈസൻസ്​ നൽകാൻ കോടതി നിർദേശം നൽകിയിരുന്നു. ഹരജികൾ ഏപ്രിൽ ഏഴിന് വീണ്ടും പരിഗണിക്കാനായി മാറ്റി. കഴിഞ്ഞ തവണ ഹരജികൾ പരിഗണിക്കുമ്പോൾ തെരുവ്​ കച്ചവടക്കാരെ നിരീക്ഷിക്കാനുള്ള വിവിധ സമിതികൾ റിപ്പോർട്ട് നൽകിയിരുന്നു. എട്ടുപേർ വ്യാജ ലൈസൻസി‍ൻെറ മറവിലാണ് വഴിയോരക്കച്ചവടം നടത്തുന്നതെന്ന് കലക്ടർ റിപ്പോർട്ട് നൽകിയതിനെ തുടർന്ന് ഇക്കാര്യം പരിശോധിച്ച് റിപ്പോർട്ട് നൽകാൻ നഗരസഭ സെക്രട്ടറിക്ക് കോടതി നിർദേശം നൽകി. എന്നാൽ, ഈ എട്ടുപേർ അനധികൃത തെരുവു കച്ചവടക്കാരല്ലെന്നും ഇവർക്ക്​ നൽകിയ സർട്ടിഫിക്കറ്റുകളിൽ അച്ചടിത്തെറ്റ് വന്നതും ഫോട്ടോ ഇല്ലാത്തതുമടക്കം ചില പോരായ്മകളുണ്ടായതാണെന്നും ചൂണ്ടിക്കാട്ടി നഗരസഭ സെക്രട്ടറി റിപ്പോർട്ട്​ നൽകി. ഇവർ എട്ടുപേരും തെരുവു കച്ചവടം നടത്താൻ അർഹതയുള്ളവരും നഗരസഭ കണ്ടെത്തിയ പട്ടികയിൽ ഉൾപ്പെട്ടവരുമാണ്​. തെറ്റു വരുത്തിയ ഉദ്യോഗസ്ഥർക്കെതിരെ അച്ചടക്ക നടപടി തുടങ്ങിയതായും നഗരസഭ അറിയിച്ചു.