കഴിക്കും മുമ്പേ അറിയാം, ഭക്ഷണത്തിന്‍റെ നിലവാരം

കൊച്ചി: ഭക്ഷണത്തിന്‍റെയും സ്ഥാപനത്തിന്‍റെയും ഗുണനിലവാരമളക്കാൻ ജില്ലയിലെ ഹോട്ടലുകളടക്കമുള്ള ഭക്ഷണ വിൽപന കേന്ദ്രങ്ങൾക്ക്​ ഗ്രേഡിങ്​ സംവിധാനം ഏർപ്പെടുത്തുന്നു. നല്ല ഭക്ഷണം ലഭിക്കുന്ന ഭക്ഷണശാലകളെ കണ്ടെത്തുന്നതിന്‍റെ ഭാഗമായാണ്​ നടപടി. ജില്ലയിലെ 40 മുതൽ 50 വരെ ഹോട്ടലുകളടക്കമുള്ള ഭക്ഷണശാലകളിൽ ഇതിന്‍റെ ഭാഗമായി ഭക്ഷ്യസുരക്ഷ വകുപ്പ്​ പരിശോധന നടത്തി സ്ഥിതിഗതികൾ വിലയിരുത്തി. ഗ്രേഡിങ്​ വരുന്നതോടെ ഏത്​ ഭക്ഷണശാലയിൽനിന്ന്​ സുരക്ഷിത ഭക്ഷണം ഉറപ്പാക്കാമെന്ന്​ ജനങ്ങൾക്ക്​ അറിയാൻ കഴിയും. ഇതുമായി ബന്ധപ്പെട്ട ​ പരിശോധനകൾ പൂർത്തിയാക്കിയതായും ഗ്രേഡിങ് സംവിധാനം വൈകാതെ​ നടപ്പിൽവരുമെന്നും ഭക്ഷ്യസുരക്ഷ വിഭാഗം അധികൃതർ അറിയിച്ചു. കാസർകോട്ട്​ ഷവർമ കഴിച്ച്​ വിദ്യാർഥിനി മരിക്കാനിടയായ സാഹചര്യത്തിൽ ജില്ലയിലുടനീളം ആരോഗ്യ വകുപ്പും ഭക്ഷ്യസുരക്ഷ അധികൃതരും പരിശോധന വ്യാപകമാക്കിയിട്ടുണ്ട്​. പുറമെനിന്ന്​ നോക്കുമ്പോൾ നല്ല അന്തരീക്ഷമാണെങ്കിലും മിക്കവാറും ഹോട്ടലുകളിലെ പാചക ഇടങ്ങളടക്കം നല്ല സാഹചര്യത്തിലല്ല പ്രവർത്തിക്കുന്നതെന്ന്​ അധികൃതർ ചൂണ്ടിക്കാട്ടി​. ഇവർക്ക്​ നോട്ടീസും പിഴയുമടക്കം നൽകിയെങ്കിലും പാലി​ക്കുന്നുണ്ടോയെന്നറിയാൻ വരുംദിവസങ്ങളിലും സ്​പെഷൽ ഡ്രൈവ്​ നടത്തും​. അധികൃതർ നിർദേശിക്കുന്ന നിയമം പാലിക്കുന്നതിനനുസരിച്ചാണ്​ ഗ്രേഡിങ്​ നൽകുന്നത്​. സ്ഥാപനങ്ങളുടെ ശുചിത്വം, ഭക്ഷ്യസുരക്ഷ നിർദേശങ്ങൾ പാലിക്കൽ എന്നിവ വിലയിരുത്തിയാണ്​ ഗ്രേഡ്​ ഉയർത്തുന്നതും താഴ്​ത്തുന്നതും. വൃത്തിയും വെടിപ്പുമുള്ള ഭക്ഷണ സംസ്കാരം വളർത്തിയെടുക്കുക എന്നതാണ്​ ഇതിലൂടെ ഉദ്ദേശിക്കുന്നതെന്നും ഭക്ഷ്യസുരക്ഷ വിഭാഗം അധികൃതർ ചൂണ്ടിക്കാട്ടി.