ബ്രഹ്മപുരം മാലിന്യ സംസ്കരണ പ്ലാന്‍റ്​; കരാർ നൽകിയതിൽ വിജിലൻസ്​ കോടതി വിശദീകരണം തേടി

മൂവാറ്റുപുഴ: ബ്രഹ്മപുരം മാലിന്യ സംസ്കരണ പ്ലാന്‍റ്​ പ്രവർത്തിപ്പിക്കുന്നതിനുള്ള കരാർ നൽകിയതിൽ അഴിമതിയുണ്ടെന്നാരോപിച്ച് നൽകിയ ഹരജിയിൽ മൂവാറ്റുപുഴ വിജിലൻസ് കോടതി വിശദീകരണം തേടി. നഗരസഭ സെക്രട്ടറി എ.എസ്. നൈസാം, സൂപ്രണ്ടിങ്​ എൻജിനീയർ കെ. ബോബൻ, സ്റ്റാർ കൺസ്ട്രക്​ഷൻ കമ്പനിയുടമകളായ സേവി ജോസഫ്, സക്കീർ ബാബു തുടങ്ങിയവരെ എതിർ കക്ഷികളാക്കിയാണ് കളമശ്ശേരി സ്വദേശി ഗിരീഷ് ബാബു ഹരജി നൽകിയത്. ഹരജി അടുത്തയാഴ്ച വീണ്ടും പരിഗണിക്കും. കൊച്ചി കോർപറേഷനുകീഴിലെ ബ്രഹ്മപുരത്തെ മാലിന്യസംസ്കരണ പ്ലാന്‍റ്​ രണ്ടു വർഷത്തേക്ക് പ്രവർത്തിപ്പിക്കാൻ മതിയായ യോഗ്യതയുള്ള കരാറുകാരിൽനിന്ന് 2021 ഏപ്രിൽ 21നാണ് നഗരസഭ ടെൻഡർ ക്ഷണിച്ചത്. പ്രതിദിനം 250 ടൺ ഖരമാലിന്യം സംസ്കരിക്കേണ്ടതുണ്ടെന്നും ഈ മേഖലയിൽ മൂന്നു വർഷമെങ്കിലും പ്രവൃത്തിപരിചയം വേണമെന്നുമാണ് നിഷ്‌കർഷിച്ചിരുന്നത്. നാലു കമ്പനികൾ ടെൻഡറിൽ പങ്കെടുത്തിരുന്നു. മലപ്പുറം, ഒറ്റപ്പാലം നഗരസഭകളിൽ സമാനരീതിയിൽ ഖരമാലിന്യ സംസ്കരണം നടത്തി പ്രവൃത്തിപരിചയം ഉണ്ടെന്ന് വ്യക്തമാക്കിയാണ് കളമശ്ശേരി സ്റ്റാർ കൺസ്ട്രക്​ഷൻ കരാർ ഉറപ്പിച്ചതെന്ന് ഹരജിയിൽ പറയുന്നു. ഒറ്റപ്പാലം, മലപ്പുറം നഗരസഭകളിൽ പ്രതിദിനം പത്തു ടൺ ഖരമാലിന്യം പോലും സംസ്കരിക്കാനാവുന്ന പ്ലാന്റുകളില്ലെന്നിരിക്കെ ഇവിടെ പ്രവൃത്തിപരിചയമുണ്ടെന്ന് വ്യക്തമാക്കി കരാർ കമ്പനി നൽകിയ രേഖകൾ വ്യാജമാണെന്ന് ഹരജിക്കാരൻ ആരോപിക്കുന്നു.