വധഗൂഢാലോചന കേസിൽ സായ് ശങ്കറിനെ മാപ്പുസാക്ഷിയാക്കാൻ നീക്കം

ആലുവ: നടിയെ ആക്രമിച്ച സംഭവം അന്വേഷിച്ച ഉദ്യോഗസ്ഥർക്കെതിരെ വധ ഗൂഢാലോചന നടത്തിയ കേസിൽ സൈബർ വിദഗ്​ധൻ സായ് ശങ്കറിനെ മാപ്പുസാക്ഷിയാക്കാൻ നീക്കം. ഇതിന്‍റെ ഭാഗമായി ആലുവ മജിസ്ട്രേറ്റ് കോടതിയിൽ ക്രൈംബ്രാഞ്ച് അപേക്ഷ നൽകി. ശനിയാഴ്ച വൈകീട്ട് മൂന്നിന്​ ഹാജരാകാൻ ഇയാൾക്ക്​ കോടതി നോട്ടീസ് അയച്ചിട്ടുണ്ട്​. നടിയെ ആക്രമിച്ച കേസിലെ തുടരന്വേഷണം മേയ് 30നകം അവസാനിപ്പിക്കണമെന്നാണ് ഹൈകോടതിയുടെ അന്ത്യശാസനം. എന്നാൽ, കേസ്​ വിസ്താരത്തിനിടെ സിനിമ മേഖലയിൽനിന്നടക്കമുള്ള പ്രോസിക്യൂഷൻ സാക്ഷികളായ 20 പേർ പ്രതിഭാഗത്തേക്ക് കൂറുമാറിയിരുന്നു. നടൻ ദിലീപിനെതിരായ ഗൂഢാലോചനക്കുറ്റം തെളിയിക്കാൻ പറ്റിയ സാക്ഷികളും ഇക്കൂട്ടത്തിൽ ഉണ്ടായിരുന്നു. ഈ സാഹചര്യത്തിലാണ് സായ് ശങ്കറിനെ മാപ്പുസാക്ഷിയാക്കുന്നത്. കൂറുമാറിയവരുടെ മൊഴി വീണ്ടും രേഖപ്പെടുത്തുന്നുണ്ട്. പ്രധാന സാക്ഷി അടക്കമുള്ളവരുടെ മൊഴിയെടുക്കൽ തുടരുകയാണ്. സിനിമ മേഖലയിൽനിന്നടക്കമുള്ളവർക്ക് വരുംദിവസങ്ങളിൽ നോട്ടീസ് നൽകുമെന്നാണ്​ വിവരം.