ശ്രീശങ്കര ജയന്തി ആഘോഷം ഇന്ന്​ മുതല്‍

കാലടി: ആദിശങ്കര ജന്മഭൂമി ക്ഷേത്രത്തിലെ ശ്രീശങ്കര ജയന്തി ആഘോഷം ഞായറാഴ്ച മുതല്‍ ആറുവരെ നടക്കും. ദിവസവും 6.30ന് മഹാഗണപതി ഹോമം, എട്ടിന് വേദം പ്രസ്ഥാനത്ര ഭാഷ്യം, ശങ്കരവിജയ പാരായണം, 8.30ന് മഹാന്യാസയുക്ത രുദ്രാഭിഷേകം, ഉച്ചക്ക് ഒന്നിന് അന്നദാനം, രാത്രി എട്ടിന് ദീപാരാധന, പ്രസാദ വിതരണം എന്നിവ ഉണ്ടാകും. വൈകീട്ട് ആറിന് സംസ്‌കൃത പണ്ഡിതര്‍ പങ്കെടുക്കുന്ന ശാസ്ത്ര വിദ്വത് സദസ്സ്​ നടക്കും. ശൃംഗേരി മഠത്തിലെ ശാസ്ത്ര പാഠശാല അധ്യക്ഷന്‍ നാഗരാജ ഭട്ട് അധ്യക്ഷത വഹിക്കും. അഞ്ചിനു വൈകീട്ട്​ ഏഴിന് ശ്രീശങ്കരീയം തിരുവാതിര സംഘം അവതരിപ്പിക്കുന്ന ശ്രീശങ്കരചരിതം ആധാരമാക്കിയ തിരുവാതിര അരങ്ങേറും. ശ്രീശങ്കര ജയന്തി ദിനമായ ആറിനു വൈകീട്ട്​ ആറിന് ശങ്കരജയന്തി സമ്മേളനം നടക്കും. സമ്മേളനത്തില്‍ മധ്യപ്രദേശ് ഷാഡോള്‍ ഡിവിഷന്‍ കമീഷണര്‍ രാജീവ് കര്‍മ മുഖ്യാതിഥിയായിരിക്കും. മഠത്തില്‍ നടക്കുന്ന രഥോത്സവത്തോടുകൂടി ശങ്കര ജയന്തി ആഘോഷം സമാപിക്കുമെന്ന് ശൃഗേരി മഠം മാനേജര്‍ പ്രഫ. എ. സുബ്രഹ്മണ്യഅയ്യര്‍ അറിയിച്ചു.