ബഹിരാകാശ ശാസ്ത്ര സമ്മേളനത്തിലേക്ക് ക്ഷണം

കളമശ്ശേരി: ബഹിരാകാശ ഗവേഷണങ്ങളെ പ്രോത്സാഹിപ്പിക്കുന്നതിനും ഈ മേഖലയിലെ പ്രശ്‌നങ്ങളും പുതിയ കണ്ടുപിടിത്തങ്ങളും അന്താരാഷ്ട്രതലത്തില്‍ ചര്‍ച്ച ചെയ്യുന്നതിനും രൂപംനല്‍കിയ കമ്മിറ്റി ഓണ്‍ സ്‌പേസ് റിസര്‍ച്ചിന്റെ (കോസ്പാര്‍) 44ാമത് ശാസ്ത്ര സമ്മേളനത്തില്‍ പങ്കെടുക്കാന്‍ കൊച്ചി സര്‍വകലാശാലയിലെ രണ്ട് ഗവേഷകര്‍ക്ക് ക്ഷണം ലഭിച്ചു. കുസാറ്റ് അന്തരീക്ഷ പഠനവകുപ്പിലെ അറ്റ്‌മോസ്ഫറിക് കെമിസ്ട്രി ആൻഡ്​ ഫിസിക്‌സ് ലബോറട്ടറിയിലെ (എ.സി.പി.എല്‍) ഗവേഷകരായ സെബാസ്റ്റ്യന്‍ ജോയി, വിഷ്ണു എം. വാര്യര്‍ എന്നിവര്‍ക്കാണ് ജൂലൈ 16 മുതല്‍ 24 വരെ ഗ്രീസിലെ ഏതന്‍സില്‍ നടക്കുന്ന ശാസ്ത്ര സമ്മേളനത്തില്‍ പങ്കെടുക്കാന്‍ അവസരം ലഭിച്ചത്. വിവിധ രാജ്യങ്ങളില്‍നിന്നുള്ള നാനൂറോളം അപേക്ഷകരില്‍നിന്നാണ് ഇരുവരെയും തെരഞ്ഞെടുത്തത്.