പ്രഷർ കുക്കർ പൊട്ടിത്തെറിച്ച്​ യുവാവ് മരിച്ചു

കട്ടപ്പന: ഭാര്യ അസുഖബാധിത ആയതിനെത്തുടർന്ന്​ അടുക്കളയിൽ പാചകത്തിന്​ കയറിയ യുവാവ്​ പ്രഷർ കുക്കർ പൊട്ടിത്തെറിച്ച് മരിച്ചു. പൂവേഴ്സ് മൗണ്ട് ഊര്യകുന്നത്ത് ഷിബുവാണ് (39) മരിച്ചത്. ഞായറാഴ്ച രാവിലെ ഏഴോടെയാണ്​ അപകടം. ഭാര്യ ജിൻസി ശാരീരിക അസ്വസ്ഥ​തകളിൽ കഴിയുന്നതിനാൽ കുറച്ചുദിവസമായി വീട്ടിലെ അടുക്കളജോലികൾ ഷിബുവാണ്​ ചെയ്തിരുന്നത്. ഞായറാഴ്ച രാവിലെ ഭക്ഷണം പാകം ചെയ്യുന്നതിനിടെയാണ് പ്രഷർ കുക്കർ പൊട്ടിത്തെറിച്ചത്​. വലിയ ശബ്ദം കേട്ട് ഭാര്യയും പിതാവും അടുക്കളയിൽ ഓടിയെത്തുമ്പോൾ ഷിബു തലക്ക് പരിക്കേറ്റ് അബോധാവസ്ഥയിൽ ആയിരുന്നു. കുക്കറിന്‍റെ അടപ്പ് ഷിബുവിന്‍റെ തലക്ക്​ ശക്തിയായി ഇടിച്ചിരുന്നു​. ഉടൻ നാട്ടുകാരുടെ സഹായത്തോടെ കട്ടപ്പനയിലെ സ്വകാര്യ ആശുപത്രിയിലേക്ക് മാറ്റി. രക്തം കട്ടപിടിച്ച സാഹചര്യത്തിൽ തലച്ചോറിൽ അടിയന്തര ശസ്ത്രക്രിയ നടത്തിയെങ്കിലും മരിച്ചു. കട്ടപ്പന പൊലീസ് നടപടി സ്വീകരിച്ചു. മക്കൾ: അന്ന, ഹെലൻ.