നടുറോഡില്‍ സ്വകാര്യവ്യക്തി സ്ഥാപിച്ച അതിര്‍ത്തിക്കല്ലുകള്‍ നാട്ടുകാര്‍ പിഴുതെറിഞ്ഞു

പാറക്കടവ്: അത്താണി-എളവൂര്‍ പൊതുമരാമത്ത് റോഡില്‍ സ്വകാര്യവ്യക്തി ടാറിങ് കുത്തിപ്പൊളിച്ച് അതിര്‍ത്തിക്കല്ല് സ്ഥാപിച്ച നടപടിയിൽ പ്രതിഷേധം. ഏറെ പ്രതിഷേധത്തിനും കാത്തിരിപ്പിനുമൊടുവിലാണ് അത്താണി-എളവൂര്‍ റോഡ് പുനർനിര്‍മാണം ആരംഭിച്ചത്. നിര്‍മാണം അവസാനഘട്ടത്തിൽ എത്തിയപ്പോഴാണ് മള്ളുശ്ശേരിയില്‍ റോഡരികില്‍ താമസിക്കുന്ന വ്യക്തി ടാറിങ് കുത്തിപ്പൊളിക്കുകയും നടുറോഡിൽ എട്ട് അതിര്‍ത്തിക്കല്ല്​ സ്ഥാപിക്കുകയും ചെയ്തതായി പരാതി ഉയര്‍ന്നത്. ടാറിങ് തടസ്സപ്പെടുത്താന്‍ ആസൂത്രിതമായി ചെയ്ത നടപടിയാണെന്നാണ്​ ആരോപണം. ഗതാഗത തടസ്സത്തിനും അപകടത്തിനും ഇടയാക്കുന്ന നടപടിയിൽ നാട്ടുകാര്‍ പ്രതിഷേധവുമായി രംഗത്തെത്തി. റോഡില്‍ സ്ഥാപിച്ച കല്ലുകള്‍ നെടുമ്പാശ്ശേരി ഗ്രാമപഞ്ചായത്ത്​ അംഗം സി.ഒ. മാര്‍ട്ടിന്‍, പാറക്കടവ് ഗ്രാമപഞ്ചായത്ത്​ അംഗവും രാജപാത സംരക്ഷണസമിതി ചെയര്‍മാനുമായ പൗലോസ് കല്ലറക്കല്‍ എന്നിവരുടെ നേതൃത്വത്തില്‍ പിഴുതെറിയുകയായിരുന്നു. സംഭവമറിഞ്ഞ് ചെങ്ങമനാട് പൊലീസും പൊതുമരാമത്ത് വകുപ്പ്​ അധികൃതരും സ്ഥലത്തെത്തുകയും നടുറോഡില്‍ കല്ലുകള്‍ സ്ഥാപിച്ച വ്യക്തിക്കെതിരെ നടപടി സ്വീകരിക്കുമെന്ന് ഉറപ്പുനല്‍കുകയും ചെയ്തു. EA ANKA 01 STONE അത്താണി-എളവൂര്‍ പൊതുമരാമത്ത് റോഡിലെ മള്ളുശ്ശേരി ഭാഗത്ത് സ്വകാര്യവ്യക്തി നടുറോഡില്‍ സ്ഥാപിച്ച കല്ലുകള്‍ ജനപ്രതിനിധികളുടെ നേതൃത്വത്തില്‍ നാട്ടുകാര്‍ പിഴുതെടുത്തപ്പോള്‍