ആഘോഷങ്ങളെത്തി; വ്യാപാര മേഖല സജീവമായി

കഴിഞ്ഞ കാല നഷ്​ടങ്ങളിൽനിന്ന്​ ഇക്കുറി പിടിച്ച്​ നിൽക്കാനാകുമെന്ന പ്രതീക്ഷയിലാണ്​ വ്യാപാരികൾ കൊച്ചി: വിഷുവും ഈസ്റ്ററും റമദാനും ഒരുമിച്ചെത്തിയതോടെ കോവിഡിൽനിന്ന്​ കരകയറാൻ ശ്രമിക്കുന്ന വ്യാപാര മേഖല സജീവമായി. രണ്ടുവര്‍ഷം നീണ്ട കോവിഡ് പ്രതിസന്ധിയും നിയന്ത്രണങ്ങളും നീങ്ങിയതോടെയാണ്​ വിപണി ഉണർന്നത്​. റമദാൻ വിപണിക്ക്​ പിന്നാലെ ​വിഷു വിപണിയും സജീവമായി. കഴിഞ്ഞ വര്‍ഷങ്ങളിൽ പ്രളയവും കോവിഡും ലോക്​ഡൗണുമെല്ലാം ചേർന്ന്​ ഓണവും പെരുന്നാളും ക്രിസ്മസും വിഷുവുമെല്ലാം നഷ്ടക്കച്ചവടമാണ്​ വ്യാപാരികൾക്ക്​ സമ്മാനിച്ചത്​. കോവിഡ്​ ബാധിതരുടെ എണ്ണത്തിൽ കുറവുണ്ടായതും ലോക്​ഡൗൺ നിയന്ത്രണം പിൻവലിച്ചതുമാണ്​ വ്യാപാരമേഖലക്ക്​ ഉണർവായത്​. കഴിഞ്ഞ കാലത്തുണ്ടായ നഷ്​ടങ്ങളിൽനിന്ന്​ ഇക്കുറി നടക്കുന്ന സീസണ്‍ കച്ചവടത്തോടെ പിടിച്ച്​ നിൽക്കാനാകുമെന്ന പ്രതീക്ഷയിലാണ്​ വ്യാപാരികൾ. മാസങ്ങൾ അടഞ്ഞുകിടന്നതിനൊപ്പം കഴിഞ്ഞ രണ്ടു വർഷവും പ്രധാന സീസണ്‍ കച്ചവടങ്ങള്‍ നഷ്ടമാകുകയും ചെയ്തതോടെ ലക്ഷക്കണക്കിന് രൂപയുടെ നഷ്ടമാണ് പലർക്കും ​സംഭവിച്ചത്​. വിപണി സജീവമാക്കാൻ പുതിയ ട്രെൻഡുകൾ അനുസരിച്ചുള്ള ഉൽപന്നങ്ങളാണ്​ മാർക്കറ്റിൽ എത്തിച്ചിരിക്കുന്നത്​. ചെരിപ്പ്, ഫാന്‍സി, മറ്റു അലങ്കാര വസ്തുക്കള്‍ എന്നിവ വിൽക്കുന്ന സ്ഥാപനങ്ങളെല്ലാം പുതിയ ഉൽപന്നങ്ങൾ വിപണിയിലെത്തിച്ചിട്ടുണ്ട്​. വർണം വിതറുന്ന ന്യൂജന്‍ പടക്കങ്ങളാണ് പടക്ക വിപണിയിൽ​ ട്രെൻഡ്​. ചൂളമടിച്ചുയരുന്ന റോക്കറ്റ് മുതല്‍ പീലിവിടർത്തുന്ന പൂത്തിരി വരെയുണ്ട്. ശബ്​ദം കുറഞ്ഞ ഫാന്‍സി പടക്കങ്ങളെയാണ്​ മിക്കവരും തെരഞ്ഞെടുക്കുന്നത്​. ഓലപ്പടക്കങ്ങൾ, മാലപ്പടക്കങ്ങൾ, കമ്പിത്തിരി, പൂത്തിരി, നിലച്ചക്രം, പൂക്കുറ്റി തുടങ്ങിയവക്കാണ്​ കൂടുതൽ​ പ്രിയം. കണികാണാന്‍ വിപണിയില്‍ കൃഷ്ണവിഗ്രഹങ്ങളും എത്തി. ഫൈബർ ഇനങ്ങൾക്ക്​ പുറമെ ഇതര സംസ്ഥാനങ്ങളിൽനിന്നുള്ള മാർബിൾ, ബ്ലാക്ക് മെറ്റൽ, പിച്ചള തുടങ്ങിയവയിൽ തീർത്തവയുമുണ്ട്. വേനൽ മഴ ചതിച്ചതോടെ കണികാണാൻ കൊന്നപ്പൂ കിട്ടാത്ത അവസ്ഥയാണ്​. ഇതോടെ വിപണിയിൽ പ്ലാസ്റ്റിക് കൊന്നപ്പൂവിന് വൻ ഡിമാൻഡ്. 60 രൂപയാണ് ഒന്നിന്റെ വില. 12 എണ്ണത്തിന് 450 രൂപയാണ്​ വില. പച്ചക്കറി വിപണിയും സജീവമാണ്​. വിലയിൽ വലിയ മാറ്റങ്ങളില്ലാത്തത്​ ആശ്വാസകരമാണെന്നാണ്​ വ്യാപാരികളും കച്ചവടക്കാരും പറയുന്നത്​. photos