വനം-ദേവസ്വം ബോർഡ്​ തർക്കം: ഹരജി വിധിപറയാൻ മാറ്റി

കൊച്ചി: തിരുവിതാംകൂർ ദേവസ്വം ബോർഡും വനംവകുപ്പും തമ്മിൽ തർക്കത്തിനിടയാക്കിയ ശബരിമലയിലെ വികസന പ്രവർത്തനങ്ങൾക്ക് അനുവദിച്ച ഭൂമിയുമായി ബന്ധപ്പെട്ട ഹരജി ഹൈകോടതി വിധിപറയാൻ മാറ്റി. ബോർഡിന്‍റെയും വനം വകുപ്പിന്‍റെയും സർക്കാറിന്‍റെയും മറ്റും വാദങ്ങൾ പൂർത്തിയാക്കിയ ശേഷമാണ്​ ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് പി.ജി. അജിത് കുമാർ എന്നിവരടങ്ങുന്ന ഡിവിഷൻ ബെഞ്ച്​ ഹരജി വിധിപറയാൻ മാറ്റിയത്​. അഞ്ചേക്കർ ഭൂമിയെച്ചൊല്ലിയുള്ള തർക്കം ശബരിമല വികസനത്തിനുള്ള മാസ്റ്റർ പ്ലാൻ നടപ്പാക്കുന്നതിന്​ തടസ്സമായതോടെയാണ്​ ഹൈകോടതിയു​ടെ ഇടപെടലുണ്ടായത്​. 1965ൽ 63.5 ഏക്കർ നൽകിയെന്നാണ് ബോർഡിന്റെ വാദം. ഇതിൽ 58.5 ഏക്കറിലാണ് മരം മുറിച്ചുള്ള വികസന പ്രവർത്തനങ്ങൾക്ക് ഉപയോഗിച്ചത്. ശേഷിച്ച അഞ്ചേക്കറിൽ മരം മുറിച്ചിരുന്നില്ല. 1980ലെ വനസംരക്ഷണ നിയമം വന്നതോടെ ഈ ഭൂമി വിട്ടുനൽകാനാവില്ലെന്ന്​ വനം വകുപ്പ് വാദിച്ചു. ബോർഡിന് അനുവദിച്ച ഭൂമി അടയാളപ്പെടുത്തി അറിയിക്കാൻ വനം വകുപ്പിന് നിർദേശം നൽകിയ കോടതി, മരം മുറിക്കാതെയുള്ള വികസന പ്രവർത്തനങ്ങൾക്ക് ഇത്​ ഉപയോഗിക്കാമെന്ന്​ അഭി​പ്രായപ്പെട്ടു.