കർദിനാൾ നടത്തിയത് കുർബാന അർപ്പണരീതിയുടെ ലംഘനം -അതിരൂപത സംരക്ഷണ സമിതി

കൊച്ചി: ഓശാന ഞായറിന് എറണാകുളം സെന്റ് മേരീസ് ബസിലിക്കയിൽ കർദിനാൾ മാർ ജോർജ് ആലഞ്ചേരി, അതിരൂപതയിൽ നിലനിൽക്കുന്ന ഒഴിവ്​ മുഖേനയുള്ള കുര്‍ബാനയര്‍പ്പണ രീതിയുടെ നിയമം ലംഘിക്കുകയാണ് ചെയ്തതെന്ന്​ അതിരൂപത സംരക്ഷണ സമിതി. ഡിസംബര്‍ 25 വരെ ജനാഭിമുഖ കുര്‍ബാനയര്‍പ്പണ രീതിയാണ് ഈ അതിരൂപതയിലെ ഇപ്പോഴത്തെ നിയമം. സമാധാനവും സംവാദവും ഉപയോഗിക്കാതെ പൊലീസിനെ ഉപയോഗിച്ച് അതിരൂപതയിലെ പ്രശ്നങ്ങള്‍ക്കെല്ലാം പ്രതിവിധി ഉണ്ടാക്കുന്ന രീതിയാണ് കര്‍ദിനാളും സിനഡ് മെത്രാന്മാരും അവലംബിക്കുന്നതെങ്കിൽ ദൈവാരാധന സംബന്ധിച്ച പ്രശ്നങ്ങളും സംഘര്‍ഷങ്ങളും ഇനിയും തുടരുമെന്നും കണ്‍വീനര്‍ ഫാ. സെബാസ്റ്റ്യന്‍ തളിയന്‍ പ്രസ്താവനയിൽ വ്യക്തമാക്കി.