ഡ്രൈവിങ്​ സ്കൂൾ ഉടമയെ മർദിച്ച സംഭവത്തിൽ കേസെടുത്തു

കാക്കനാട്: ടെസ്റ്റ്‌ ഗ്രൗണ്ടിന് സമീപം ഡ്രൈവിങ്​ സ്കൂളിന് സമീപത്ത് ഉടമയെ മർദിച്ച സംഭവത്തിൽ കാക്കനാട് ഡ്രൈവിങ്​ സ്കൂൾ നടത്തുന്ന ലിയാസ്, സുഹൃത്ത് ശശി എന്നിവർക്കെതിരെ പൊലീസ് കേസെടുത്തു. മർദനമേറ്റ കെ.എൻ. അരുൺകുമാറി‍ൻെറ പരാതിയിലാണ് നടപടി. മാർച്ചിലായിരുന്നു സംഭവം. ഡ്രൈവിങ്​ ടെസ്റ്റുമായി ബന്ധപ്പെട്ട് നേരത്തേ നടന്ന തർക്കമാണ് മർദനത്തിലേക്ക് നയിച്ചതെന്നാണ് പരാതിക്കാര‍ൻെറ ആരോപണം. ഇതുസംബന്ധിച്ച സി.സി ടി.വി ദൃശ്യങ്ങൾ സഹിതമായിരുന്നു പൊലീസിനെ സമീപിച്ചത്. നേരത്തെ കാക്കനാട്ടെ ഡ്രൈവിങ്​ ടെസ്റ്റ് ഗ്രൗണ്ട് നശിപ്പിക്കുന്ന തരത്തിലാണ് ഇവർ പരിശീലനം നൽകുന്നതെന്ന് ആരോപിച്ച് വിവിധ ഡ്രൈവിങ്​ സ്കൂൾ ഉടമകൾ എറണാകുളം ആർ.ടി.ഒക്ക് പരാതി നൽകിയിരുന്നു. തുടർന്ന് ഭാരവാഹനങ്ങൾ ടെസ്റ്റ് ഗ്രൗണ്ടിൽ പ്രവേശിപ്പിക്കരുതെന്ന് മോട്ടോർ വാഹന വകുപ്പ് അധികൃതർ കർശന നിർദേശവും നൽകി. അതിനിടെ ആരോപണമുയർന്ന ഡ്രൈവിങ്​ സ്കൂൾ അധികൃതർ ഹെവി ലൈസൻസ് ടെസ്റ്റിനായി ഉപയോഗിക്കുന്ന ബസ് ടെസ്റ്റ് ഗ്രൗണ്ടിലേക്ക് കയറ്റുകയായിരുന്നു. ഇതി‍ൻെറ വിഡിയോ പകർത്തിയെന്ന് ആരോപിച്ചായിരുന്നു അരുണിനെ മർദിച്ചതെന്നായിരുന്നു പരാതി.