വിദ്യാർഥിനികളെ അപമാനിച്ച വിദ്യാർഥിക്കെതിരെ കർശനനടപടി വേണമെന്ന്

കളമശ്ശേരി: ഹോളി ആഘോഷത്തിനിടെ ജൂനിയർ വിദ്യാർഥിനികളെ അപമാനിച്ചതായ സംഭവത്തിൽ അറസ്റ്റിലായ വിദ്യാർഥിക്കെതിരെ കർശന നടപടി വേണമെന്ന് അന്വേഷണ കമ്മിറ്റിയിൽ അഭിപ്രായം. സംഭവം അന്വേഷിക്കുന്ന സർവകലാശാല നിയോഗിച്ച ഇന്‍റേണൽ കംപ്ലയിന്‍റ്​ കമ്മിറ്റിയിലാണ് ശക്തമായ നടപടിക്ക് ശിപാർശ ചെയ്യണമെന്ന് അഭിപ്രായമുയർന്നത്. വെള്ളിയാഴ്ച ചേർന്ന അവസാന സിറ്റിങ്ങിലായിരുന്നു തീരുമാനം. കമ്മിറ്റിയുടെ റിപ്പോർട്ട് തിങ്കളാഴ്ച രജിസ്ട്രാർക്ക് സമർപ്പിക്കുമെന്നാണ് സൂചന. മാർച്ച്​ 18ന് നടന്ന ഹോളി ആഘോഷത്തിനിടെയാണ് കുസാറ്റിലെ മൂന്നാം വർഷ ബി.വോക് വിദ്യാർഥി മാനവ് അഷ്​റഫ് വിദ്യാർഥിനികളെ അപമാനിച്ചതായി പരാതി ഉയർന്നത്. സംഭവം കേസായതോടെ ഒരുവിദ്യാർഥിയുടെ പരാതിയിൽ കോടതിയിൽനിന്ന്​ അഷ്​റഫ് മുൻകൂർജാമ്യം നേടി. പിന്നാലെ പരാതി നൽകിയ മറ്റൊരു വിദ്യാർഥിനിയുടെ കേസിൽ കളമശ്ശേരി പൊലീസ് അറസ്റ്റ് ചെയ്യുകയായിരുന്നു.