ഗുരുവായൂർ ദേവസ്വം മാനേജിങ്​ കമ്മിറ്റി: മോഹനകൃഷ്ണന്​ തുടരാമെന്ന്​ ഹൈകോടതി

കൊച്ചി: കമ്മിറ്റിയുടെ കാലാവധി കഴിഞ്ഞെങ്കിലും കെ.വി. മോഹനകൃഷ്ണന്​ ഗുരുവായൂർ ദേവസ്വം മാനേജിങ്​ മാനേജിങ്​ കമ്മിറ്റി അംഗമായി തുടരാമെന്ന്​ ഹൈകോടതി. അംഗത്തിന്റെ കാലാവധി പൂർത്തിയാകാത്ത സാഹചര്യം​ വിലയിരുത്തിയാണ്​ ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് പി.ജി. അജിത് കുമാർ എന്നിവരടങ്ങുന്ന ​ഡിവിഷൻ ബെഞ്ചിന്‍റെ ഉത്തരവ്​. കമ്മിറ്റി അംഗമായി തുടരുന്നത് ചോദ്യംചെയ്ത് ഗുരുവായൂർ ദേവസ്വം എംപ്ലോയീസ്​ അസോസിയേഷൻ പ്രസിഡന്റ് സി.വി. വിജയൻ നൽകിയ ഹരജി കോടതി തള്ളി. കമ്മിറ്റിയിലേക്ക് സർക്കാറിന് നിർദേശിക്കാവുന്ന അഞ്ചംഗങ്ങളിൽ നാലുപേരെ 2020 ജനുവരി 23ന്​ നോമിനേറ്റ് ചെയ്തിരുന്നു. രണ്ടുവർഷമാണ് കമ്മിറ്റിയുടെ കാലാവധി. അഞ്ചാമത്തെ അംഗമായി മോഹനകൃഷ്‌ണനെ 2020 നവംബർ ആറിനാണ് നോമിനേറ്റ് ചെയ്തത്. കമ്മിറ്റിയുടെ കാലാവധി 2022 ജനുവരി 23ന്​ കഴിഞ്ഞതിനാൽ മോഹനകൃഷ്‌ണന്റെ നിയമനകാലാവധിയും കഴിഞ്ഞെന്നായിരുന്നു ഹരജിക്കാരന്‍റെ വാദം. എന്നാൽ, കമ്മിറ്റിയുടെ കാലാവധിയല്ല, അംഗത്തിന്റെ കാലാവധിയാണ് പരിഗണിക്കേണ്ടതെന്ന സർക്കാറിന്റെയും ഗുരുവായൂർ ദേവസ്വത്തിന്റെയും വാദം ഡിവിഷൻ ബെഞ്ച് ശരിവെച്ചു. നവംബർ ആറുവരെ മോഹനകൃഷ്ണന്​ തുടരാമെന്നും​ കോടതി വ്യക്തമാക്കി.