വായ്‌പ കുടിശ്ശിക: ലോറി കരിമ്പട്ടികയിൽപെടുത്തിയതിനെതിരായ ഹരജിയിൽ വിശദീകരണം തേടി

കൊച്ചി: വായ്‌പ കുടിശ്ശികയുടെ പേരിൽ ചരക്കുലോറി കരിമ്പട്ടികയിൽപെടുത്തിയതിനെതിരെ വാഹന ഉടമയുടെ ഹരജി. ലോറിയുടെ നികുതിയടക്കാനും പെർമിറ്റ് പുതുക്കാനും കഴിയുന്നില്ലെന്ന് ചൂണ്ടിക്കാട്ടി കൊച്ചി സ്വദേശി റെജി വർഗീസാണ്​ ഹൈകോടതിയെ സമീപിച്ചത്​. ഹരജി പരിഗണിച്ച ജസ്റ്റിസ്​ സതീശ്​ നൈനാൻ ഗതാഗത കമീഷണറുടെ വിശദീകരണം തേടി. മോട്ടോർ വാഹനങ്ങളുടെ നികുതിയടക്കാനും മറ്റുമുള്ള പരിവാഹൻ ഓൺലൈൻ പോർട്ടൽ സേവനങ്ങൾ നിഷേധിക്കുന്നത്​ നിയമപരമല്ലെന്നാണ് ഹരജിക്കാരന്‍റെ വാദം. സ്വകാര്യ ധനകാര്യ സ്ഥാപനത്തിൽ വായ്‌പ കുടിശ്ശികയുണ്ടെന്ന പേരിൽ വാഹനങ്ങളെ കരിമ്പട്ടികയിൽപെടുത്താൻ മോട്ടോർ വാഹന നിയമത്തിൽ വ്യവസ്ഥയില്ല. സ്വകാര്യ ധനകാര്യ സ്ഥാപനങ്ങൾ നിയമം ദുരുപയോഗം ചെയ്യുകയാണ്​. വാഹനങ്ങളെ കരിമ്പട്ടികയിൽപെടുത്തുന്നതിലൂടെ സർക്കാറിന്​ ലഭിക്കാനുള്ള വാഹന നികുതിയും ഇതര ഫീസുകളും ലഭിക്കാതാവുമെന്നും ഹരജിയിൽ പറയുന്നു.