വിവാഹ വാഗ്​ദാനം നൽകി ഡോക്ടറെ പീഡിപ്പിച്ച കേസ്​: പൊലീസ്​ ഉദ്യോഗസ്ഥന്​ മുൻകൂർ ജാമ്യം

കൊച്ചി: ഡോക്ടറെ വിവാഹവാഗ്ദാനം നൽകി പീഡിപ്പിച്ച കേസിൽ പ്രതിയായ പൊലീസ്​ ഉദ്യോഗസ്ഥന്​​ ഹൈകോടതിയുടെ മുൻകൂർ ജാമ്യം. തിരുവനന്തപുരം മലയൻകീഴ് സ്​റ്റേഷൻ ഹൗസ്​ ഓഫിസറായിരുന്ന എ.വി. സൈജുവിനാണ്​ ഉപാധികളോടെ ജസ്റ്റിസ്​ പി. ഗോപിനാഥ്​ മുൻകൂർ ജാമ്യം അനുവദിച്ചത്​. അറസ്റ്റ് ചെയ്താൽ 50,000 രൂപയുടെ സ്വന്തവും തുല്യതുകക്കുള്ള രണ്ട് ആൾജാമ്യത്തിലും വിട്ടയക്കണമെന്നാണ് ഉത്തരവ്​. മലയിൻകീഴ്​ എസ്.എച്ച്.ഒ ആയിരിക്കെ 2019 ഒക്​ടോബർ 13ന് വീട്ടിലെത്തി ബലാത്സംഗം ചെയ്തെന്നും തുടർന്ന്​ പലതവണ ലൈംഗികബന്ധം പുലർത്തിയെന്നും ചൂണ്ടിക്കാട്ടി യുവതി നൽകിയ പരാതിയിലാണ്​ കേസെടുത്തത്​. എന്നാൽ, ബലാത്സംഗ ആരോപണം തെറ്റാണെന്ന വാദവുമായാണ്​ ഹരജിക്കാരൻ കോടതിയെ സമീപിച്ചത്​. മുൻകൂർ ജാമ്യം അനുവദിച്ചെങ്കിലും അന്വേഷണം സംസ്ഥാന പൊലീസ് മേധാവി നിർദേശിക്കുന്ന ഉദ്യോഗസ്ഥന്റെ മേൽനോട്ടത്തിലാണ്​ വേണ്ടതെന്ന്​ കോടതി നിർദേശിച്ചു. മുതിർന്ന ഉദ്യോഗസ്ഥനെ ഇതിന്​ നിയോഗിക്കണമെന്നും നിർദേശിച്ചിട്ടുണ്ട്​.