നായ്​ വട്ടം ചാടി; ഇരുചക്രവാഹനം അപകടത്തിൽപെട്ടു

കാക്കനാട്: നായ്​ വട്ടം ചാടിയതിനെ തുടർന്ന് നിയന്ത്രണം വിട്ട ഇരുചക്രവാഹനം അപകടത്തിൽപെട്ടു. ബുധനാഴ്ച രാവിലെ പാലച്ചുവട്-വെണ്ണല റോഡിലായിരുന്നു സംഭവം. പുല്ലേപ്പടി സ്വദേശിനി റിട്ട. അധ്യാപികയും മകനുമാണ് അപകടത്തിൽപെട്ടത്. വാഹനത്തിനുനേരെ നായ്​ കുരച്ചു ചാടിയതോടെ നിയന്ത്രണം വിട്ട് മറിയുകയായിരുന്നു. ഇരുവർക്കും കാര്യമായ പരിക്കില്ലെന്ന് നാട്ടുകാർ പറഞ്ഞു. കുറച്ചുനാളായി തെരുവുനായ്ക്കളുടെ കൈയിലാണ് പാലച്ചുവട്-വെണ്ണല റോഡ്. പലയിടത്തും രൂക്ഷമായ ശല്യമാണ് അനുഭവപ്പെടുന്നതെന്ന് നാട്ടുകാർ പറയുന്നു. യാത്രക്കാർക്ക് നേരെ കുരച്ചുചാടുന്നത് സ്ഥിരം സംഭവമാണ്. ഇത്തരത്തിൽ നായ്​ ശല്യത്തെ തുടർന്ന് സ്കൂട്ടർ യാത്രക്കാരും കാൽനടക്കാരും ഉൾപ്പെടെ പലതവണ അപകടത്തിൽപെട്ടിട്ടുണ്ട്.