ലക്ഷദ്വീപ് ജനതക്ക്​ കൈത്താങ്ങായി സമസ്തയുടെ ധനസഹായം

കൊച്ചി: കോവിഡിനൊപ്പം കൊടുങ്കാറ്റുൾപ്പെടെ പ്രകൃതിക്ഷോഭങ്ങൾ ഏറ്റുവാങ്ങിയ ലക്ഷദ്വീപ് ജനതക്ക്​ ആശ്വാസത്തിന്‍റെ കൈത്താങ്ങുമായി സമസ്ത കേരള ജംഇയ്യതുൽ ഉലമയും സമസ്ത കേരള ഇസ്​ലാം മതവിദ്യാഭ്യാസ ബോർഡും. സമസ്തയുടെ ദുരിതാശ്വാസ സഹായം 25 ലക്ഷം രൂപ കൊച്ചിയിൽ നടന്ന ചടങ്ങിൽ കൈമാറി. സമസ്ത കേരള ജംഇയ്യതുൽ ഉലമ കേന്ദ്ര മുശാവറ അംഗവും അമിനി ദ്വീപ് ഖാദിയുമായ ഫത്തഹുല്ല പി. മുത്തുകോയ തങ്ങൾ സമസ്ത കേരള ഇസ്​ലാം മത വിദ്യാഭ്യാസ ബോർഡ് ജനറൽ സെക്രട്ടറി എം.ടി. അബ്ദുല്ല മുസ്​ലിയാരിൽനിന്ന് ഫണ്ട് ഏറ്റുവാങ്ങി. എം.ടി. അബ്ദുല്ല മുസ്​ലിയാർ അധ്യക്ഷത വഹിച്ചു. സമസ്ത കേന്ദ്ര മുശാവറ അംഗവും പ്രവാസി സെൽ ചെയർമാനുമായ ഹസൻകുട്ടി മുസ്​ലിയാർ ആദ്യശ്ശേരി, കേന്ദ്ര മുശാവറ അംഗം ഇ.എസ്. ഹസൻ ഫൈസി, പ്രവാസി സെൽ കൺവീനർ മാന്നാർ ഇസ്മായിൽ കുഞ്ഞ് ഹാജി, ഷംസുദ്ദീൻ മുസ്​ലിയാർ എന്നിവർ സംസാരിച്ചു. സമസ്ത വിദ്യാഭ്യാസ ബോർഡ് മാനേജർ കെ. മോയിൻകുട്ടി സ്വാഗതവും എസ്.വൈ.എസ് സംസ്ഥാന ട്രഷറർ എ.എം. പരീത് നന്ദിയും പറഞ്ഞു. ER LAKSHADWEEP ലക്ഷദ്വീപ് ജനതക്ക്​ സമസ്തയുടെ ദുരിതാശ്വാസ സഹായം കേന്ദ്ര മുശാവറ അംഗം ഫത്തഹുല്ല പി. മുത്തുകോയ തങ്ങൾ സമസ്ത കേരള ഇസ്​ലാം മത വിദ്യാഭ്യാസ ബോർഡ് ജനറൽ സെക്രട്ടറി എം.ടി. അബ്ദുല്ല മുസ്​ലിയാരിൽനിന്ന് ഏറ്റുവാങ്ങുന്നു