കുട്ടമ്പുഴയിൽ വീട്ടിൽ കവർച്ച; പണവും സ്വർണവും നഷ്ടപ്പെട്ടു

കോതമംഗലം: കുട്ടമ്പുഴയിൽ വീട്ടിൽനിന്ന് പണവും സ്വർണവും കവർന്നു. ഞായപ്പിള്ളി കളമ്പാട്ട് ജോസ് കുര്യന്‍റെ വീട്ടിലാണ് കവർച്ച നടന്നത്. മുറിയിലെ അലമാരയിൽ സൂക്ഷിച്ചിരുന്ന ഏഴ് പവനും 80,000ഓളം രൂപയും നഷ്ടപ്പെട്ടിട്ടുണ്ടെന്നാണ് പ്രാഥമിക നിഗമനം. ഞായറാഴ്ച വൈകീട്ട് തൊട്ടടുത്ത പള്ളിയിൽ ധ്യാനത്തിന് പോയ ജോസും ഭാര്യയും രാത്രി എട്ടേമുക്കാലോടെ വീട്ടിൽ തിരിച്ചെത്തിയപ്പോഴാണ്‌ മോഷണം അറിഞ്ഞത്. മുൻവശത്തുനിന്ന് പൂട്ടിയിരുന്ന കതക് തുറക്കാൻ കഴിയാതെ വന്നപ്പോൾ വീടിന്‍റെ പിറക് വശത്ത് ചെന്നുനോക്കിയപ്പോൾ കതക് തുറന്നു കിടക്കുന്നതാണ് കണ്ടത്. കുട്ടമ്പുഴ പൊലീസ് ഇൻസ്പെക്ടർ മഹേഷിന്‍റെ നേതൃത്വത്തിൽ പൊലീസും വിരലടയാള വിദഗ്​ധരും, ഡോഗ് സ്ക്വാഡും സ്ഥലത്തെത്തി പരിശോധന നടത്തി.