മാലിന്യം തള്ളുന്നവരെ ഇനി കാമറ കുടുക്കും

കാക്കനാട്: തൃക്കാക്കര നഗരസഭയെ മാലിന്യമുക്തമാക്കുന്നതിന്​ സ്ഥാപിച്ച നിരീക്ഷണ കാമറകളുടെ ഉദ്ഘാടനം കലക്ടർ ജാഫർ മാലിക് നിർവഹിച്ചു. നഗരസഭ ചെയർപേഴ്സൻ അജിത തങ്കപ്പൻ അധ്യക്ഷത വഹിച്ചു. ചെമ്പുമുക്ക്, സെസ്, നവോദയ, ടി.വി സെന്‍റർ, കാക്കനാട് തുടങ്ങി 10 കേന്ദ്രത്തിലാണ് കാമറകൾ സ്ഥാപിച്ചിട്ടുള്ളത്. ബുധനാഴ്ച രാത്രിയോടെയായിരുന്നു കാമറകൾ സ്ഥാപിച്ചത്. മാലിന്യം വലിച്ചെറിയുന്നതിന് പിടിക്കപ്പെടുന്നവരിൽനിന്ന് വൻതുക ഈടാക്കുമെന്ന് അജിത തങ്കപ്പൻ പറഞ്ഞു. നഗരസഭ ഉപാധ്യക്ഷൻ എ.എ. ഇബ്രാഹീംകുട്ടി, വിവിധ സ്ഥിരം സമിതി അധ്യക്ഷന്മാർ, കൗൺസിലർമാർ, ഉദ്യോഗസ്ഥർ തുടങ്ങിയവർ പങ്കെടുത്തു. ഫോട്ടോ: മാലിന്യം വലിച്ചെറിയുന്നവരെ പിടികൂടാൻ തൃക്കാക്കര നഗരസഭയിൽ സ്ഥാപിച്ച നിരീക്ഷണ കാമറകളുടെ ഉദ്ഘാടനം കലക്ടർ ജാഫർ മാലിക് നിർവഹിച്ചപ്പോൾ