ഓട്ടോ ചാർജ് വർധന അശാസ്ത്രീയം -എച്ച്.എം.എസ്

കൊച്ചി: ബസ് ചാർജ് വർധനക്കൊപ്പം ഓട്ടോ ചാർജും കൂട്ടിയെന്ന പ്രഖ്യാപനത്തിൽ യഥാർഥത്തിൽ മിനിമം ചാർജ് കൂട്ടുന്നതിന് പകരം കുറക്കുകയാണ്​ ഉണ്ടായതെന്നും ഓട്ടോക്കാരുടെ പിച്ചച്ചട്ടിയിൽ കൈയിട്ടുവാരുന്ന നടപടിയാണിതെന്നും കേരള സ്റ്റേറ്റ് മോട്ടോർ ആൻഡ് എൻജിനീയർ ലേബർ സെന്‍റർ ( എച്ച്.എം.എസ്) അടിയന്തര സംസ്ഥാന നേതൃയോഗം കുറ്റപ്പെടുത്തി. നിലവിലെ വർധന തികച്ചും അശാസ്ത്രീയമാണെന്നും ഇത് പുനഃപരിശോധിക്കണമെന്നും യോഗം ആവശ്യപ്പെട്ടു. എച്ച്.എം.എസ് ദേശീയ വർക്കിങ് കമ്മിറ്റി അംഗം മനയത്ത് ചന്ദ്രൻ നേതൃയോഗം ഉദ്ഘാടനം ചെയ്തു. സംസ്ഥാന പ്രസിഡന്റ് മനോജ് ഗോപി അധ്യക്ഷത വഹിച്ചു.