കെ-റെയില്‍: ആശങ്കയകറ്റണം -കെ.സി.ബി.സി

കൊച്ചി: കെ-റെയിൽ പദ്ധതിയുമായി ബന്ധപ്പെട്ട് ആശങ്കകള്‍ വർധിച്ചുവരുന്ന സാഹചര്യത്തില്‍, ജനങ്ങളുടെ ഭാഗത്തുനിന്ന്​ ചിന്തിച്ച് ഉചിത തീരുമാനങ്ങളെടുക്കണമെന്ന് കേരള കാത്തലിക് ബിഷപ്സ് കൗൺസിൽ. പതിനായിരക്കണക്കിന് കുടുംബങ്ങള്‍ അരക്ഷിതാവസ്ഥയില്‍ അകപ്പെട്ട ഈ സാഹചര്യത്തില്‍ ഗൗരവമായിതന്നെ വിമര്‍ശനങ്ങളെ സര്‍ക്കാര്‍ ഉള്‍ക്കൊള്ളണം. വികസനപദ്ധതികള്‍ക്ക് ജനം എതിരല്ല. എന്നാല്‍, ജനത്തെ ഇരുട്ടില്‍ നിര്‍ത്തി പദ്ധതികള്‍ അടിച്ചേല്‍പിക്കാന്‍ ശ്രമിക്കുന്നതും അതിന്​ ബലപ്രയോഗങ്ങള്‍ നടത്തുന്നതും ജനാധിപത്യവിരുദ്ധമാണ്. പദ്ധതിയുടെ പൂര്‍ണചിത്രം വെളിപ്പെടുന്നതുവരെ ഇപ്പോഴുള്ള നടപടിക്രമങ്ങള്‍ നിര്‍ത്തിവെക്കണം. സംശയങ്ങള്‍ ദൂരീകരിച്ചും ആശങ്കകള്‍ അകറ്റിയും മാത്രമേ വികസനപ്രവര്‍ത്തനങ്ങള്‍ നടപ്പാക്കാവൂവെന്നും കെ.സി.ബി.സി ഡെപ്യൂട്ടി സെക്രട്ടറി ജനറല്‍ ഫാ. ജേക്കബ് ജി. പാലക്കാപ്പിള്ളി പ്രസ്താവനയിൽ പറഞ്ഞു.