പള്ളിക്കരയിൽ കടകൾ പ്രവർത്തിക്കും -വ്യാപാരി വ്യവസായി നേതാക്കള്‍

പള്ളിക്കര: ദേശീയ പണിമുടക്ക് ദിവസമായ തിങ്കള്‍, ചൊവ്വ ദിവസങ്ങളില്‍ പതിവുപോലെ കടകള്‍ പ്രവര്‍ത്തിക്കുമെന്ന് വ്യാപാരി വ്യവസായി നേതാക്കള്‍ വാർത്തസമ്മേളനത്തില്‍ പറഞ്ഞു. പള്ളിക്കര യൂനിറ്റിന് കീഴില്‍ വരുന്ന 240 കട ഉടമകള്‍ക്കുവേണ്ടി പള്ളിക്കര വ്യാപാരി വ്യവസായി യൂനിറ്റ് ഹൈകോടതിയെ സമീപിച്ചതിനെ തുടര്‍ന്ന് കട തുറന്ന് പ്രവര്‍ത്തിക്കാൻ സംരക്ഷണം നല്‍കണമെന്ന് കുന്നത്തുനാട് പൊലീസിനോട് ആവശ്യപ്പെട്ടിട്ടുണ്ട്. 15 ദിവസം മുമ്പ് സംയുക്ത സമരസമിതി നേതാക്കള്‍ പള്ളിക്കരയില്‍ പണിമുടക്ക് ദിവസം കടകള്‍ അടക്കണമെന്ന്​ ആവശ്യപ്പെട്ട് വ്യാപാരി വ്യവസായികള്‍ക്ക് നോട്ടീസ് നല്‍കിയിരുന്നു. ഇതേ തുടര്‍ന്നാണ് ഇവര്‍ കോടതിയെ സമീപിച്ചത്. പ്രസിഡന്‍റ്​ സി.ജി. ബാബു, ജനറൽ സെക്രട്ടറി എന്‍.പി. ജോയി, പി.എം. ജോയി, പി.പി. സിജുകുമാര്‍, വി.ആര്‍. രാജീവ് എന്നിവര്‍ വാർത്തസമ്മേളനത്തില്‍ പങ്കെടുത്തു.