ബി.പി സി.എല്ലിൽ പണിമുടക്ക് വിലക്കി ഹൈകോടതി

കൊച്ചി: തൊഴിലാളി യൂനിയനുകള്‍ മാര്‍ച്ച് 28, 29 തീയതികളില്‍ ആഹ്വാനം ചെയ്തിരിക്കുന്ന ദേശീയ പണിമുടക്ക് അമ്പലമുകൾ ബി.പി.സി.എല്ലിൽ നടത്തുന്നത് ഹൈകോടതി തടഞ്ഞു. പണിമുടക്കിനെതിരെ ഭാരത് പെട്രോളിയം കോര്‍പറേഷന്‍ ലിമിറ്റഡ് (ബി.പി.സി.എൽ) ഫയല്‍ ചെയ്ത ഹരജിയിലാണ് ജസ്റ്റിസ് അമിത് റാവലിന്‍റെ ഇടക്കാല ഉത്തരവ്. അവശ്യമേഖലയിലെ ഇന്ധന വിതരണം തടസ്സപ്പെടുമെന്ന്​ കാട്ടിയായിരുന്നു ഹരജി. പണിമുടക്കുമെന്നുകാട്ടി വിവിധ യൂനിയനുകള്‍ നേരത്തേ കമ്പനിക്ക്​ നോട്ടീസ് നല്‍കിയിരുന്നു. ഇതേതുടര്‍ന്ന് കമ്പനി ചര്‍ച്ചക്ക്​ നോട്ടീസ് നല്‍കിയെങ്കിലും യൂനിയനുകള്‍ അനുകൂല നിലപാട് സ്വീകരിച്ചില്ലെന്ന് ചൂണ്ടിക്കാട്ടിയായിരുന്നു ഹരജി.