അഗ്​നിരക്ഷാ നിലയത്തിലെ ഫോൺ തകരാറിൽ ; കൈമലർത്തി ബി.എസ്.എൻ.എൽ

കാക്കനാട്: തൃക്കാക്കര അഗ്​നിരക്ഷാ നിലയത്തിൽ ഫോൺ തകരാറിലായിട്ട് 12 ദിവസമാകുന്നു. ഗ്യാസ് പൈപ്പ് ലൈൻ സ്ഥാപിക്കാൻ കുഴിയെടുത്തതിന് പിന്നാലെയാണ് ഫോൺ തകരാറിലായത്. അഗ്​നിരക്ഷാ നിലയത്തിലെ ഉൾപ്പെടെ നിരവധി ടെലിഫോൺ കണക്ഷനുകളാണ് നിലച്ചത്. സ്റ്റേഷൻ ഓഫിസറുടെ ഔദ്യോഗിക മൊബൈലിലേക്ക് കാൾ ഡൈവർട്ട് സംവിധാനം വഴിയാണ് നിലവിൽ പ്രവർത്തനം നടത്തുന്നത്. കാക്കനാട് എൻ.ജി.ഒ ക്വാർട്ടേഴ്സ് ജങ്​ഷനിലെ ആകാശവാണി കൊച്ചി നിലയത്തിനടുത്ത് കുഴിയെടുത്തപ്പോഴാണ്​ ലൈൻ പൊട്ടിയത്. ഫോൺ നിലച്ചത് മനസ്സിലായതോടെ അധികൃതർ ബി.എസ്.എൻ.എല്ലുമായി ബന്ധപ്പെട്ട് തൃക്കാക്കര നിലയത്തിലെ 0484 2423100 എന്ന നമ്പറിലേക്ക് വരുന്ന കാളുകൾ മുഴുവൻ സ്റ്റേഷൻ ഓഫിസറുടെ ഔദ്യോഗിക മൊബൈൽ നമ്പറിലേക്ക് വഴിതിരിച്ചുവിടാൻ ആവശ്യപ്പെടുകയായിരുന്നു. തുടർന്ന് ഓഫിസിലേക്ക് എത്തിയ നിരവധി കാളുകൾ ഈ മൊബൈൽ നമ്പർ വഴിയാണ്​ ഉദ്യോഗസ്ഥർ കൈകാര്യം ചെയ്തത്. സംഭവം നടന്ന് രണ്ടാഴ്ച ആകാറായിട്ടും ഫോൺ ശരിയാകാതെ വന്നതോടെ ബി.എസ്.എൻ.എൽ അധികൃതരുമായി ബന്ധപ്പെട്ടെങ്കിലും ഉടൻ ശരിയാകും എന്ന മറുപടി ലഭിക്കുന്നതല്ലാതെ ഇതുവരെ അനുകൂല നടപടി ഉണ്ടായില്ലെന്നാണ് ഉദ്യോഗസ്ഥരുടെ പരാതി.