ബസ് യാത്രക്കിടെ വീട്ടമ്മയുടെ പണവും ആഭരണവും കവർന്നു നഷ്ടപ്പെട്ടത് ചികിത്സക്കായി നാട്ടുകാർ സ്വരൂപിച്ച പണം

പള്ളുരുത്തി: സ്വകാര്യ ബസിൽ യാത്രചെയ്യുന്നതിനിടെ വീട്ടമ്മയുടെ ബാഗിൽ സൂക്ഷിച്ചിരുന്ന പഴ്സ് അപഹരിച്ചു. പഴ്സിലുണ്ടായിരുന്ന 45,000 രൂപയും രണ്ടുപവൻ വരുന്ന വളയും ബാങ്ക് രേഖകളും നഷ്ടപ്പെട്ടു. വൈറ്റില സഹകരണ റോഡിൽ വലിയപറമ്പിൽ ഉഷയുടെ പണവും ആഭരണവുമാണ് നഷ്ടപ്പെട്ടത്​​. ചികിത്സ കാര്യങ്ങൾക്കായി നെട്ടൂരിൽ മാതാപിതാക്കൾക്കൊപ്പമാണ് ഉഷ താമസിക്കുന്നത്. അഞ്ചുവർഷം മുമ്പ്​ ഭർത്താവ് മോഹനൻ മരിച്ചതോടെ ഉഷയുടെ ജീവിതം പ്രതിസന്ധിയിലാണ്​. രണ്ടുമക്കളുടെ വിദ്യാഭ്യാസവും രോഗിയായ തന്‍റെ ചികിത്സയും വെല്ലുവിളിയായി. അംഗൻവാടിയിലെ ഹെൽപറായി ജോലിചെയ്യുന്ന ഉഷക്ക്​ കരളിന് ഗുരുതര തകരാറുണ്ട്. അടിയന്തരമായി ഓപറേഷൻ ചെയ്യണമെന്ന ഡോക്ടർമാരുടെ നിർദേശത്തെതുടർന്ന്​ നാട്ടുകാരുടെയും ഒപ്പം ജോലിചെയ്യുന്നവരുടെയും സഹായത്താൽ ചികിത്സക്കുള്ള പണം കണ്ടെത്തി ആശുപത്രിയിൽ അഡ്മിറ്റാകാൻ പോകുമ്പോഴാണ്​ കുണ്ടന്നൂരിനും എറണാകുളം വളഞ്ഞമ്പലത്തിനും ഇടയിൽ മോഷണം നടന്നത്. ബസിൽനിന്നിറങ്ങി ബാഗ് നോക്കിയപ്പോഴാണ് പണം പോയ വിവരമറിയുന്നത്. എറണാകുളം സൗത്ത് ടൗൺ പൊലീസ് സ്റ്റേഷനിൽ പരാതി നൽകി.