ജെറ്റ് എയർവേസ്​ പറക്കുന്ന കാര്യത്തിൽ തീരുമാനമായില്ല

നെടുമ്പാശ്ശേരി: ജെറ്റ് എയർവേസ്​ വിമാനക്കമ്പനി വീണ്ടും സർവിസ്​ ആരംഭിക്കുന്നത് സംബന്ധിച്ച് അനിശ്ചിതത്വം തുടരുന്നു. സാമ്പത്തികപ്രതിസന്ധിയെ തുടർന്ന് 2019 ഏപ്രിൽ 17 നാണ്​ വിമാനക്കമ്പനി സർവിസ് നിർത്തിയത്​. പുതിയ സംരംഭകർ കമ്പനി ഏറ്റെടുത്തെങ്കിലും രാജ്യാന്തര സർവിസ്​ പുനരാരംഭിക്കുന്ന മാർച്ച്​ 27 മുതൽ സർവിസ്​ ആരംഭിക്കാൻ അനുമതിയായിട്ടില്ല. 27 രാജ്യങ്ങളിലേക്ക്​ നിത്യേന 300 സർവിസാണ്​ ജെറ്റ്​ എയർവേസ്​ നടത്തിയിരുന്നത്. പ്രവർത്തനം നിർത്തിയതിനെ തുടർന്ന് ജെറ്റിന് അനുവദിച്ചിരുന്ന റൂട്ടുകൾ പലതും മറ്റ് വിമാനക്കമ്പനികൾക്ക് കൈമാറി. ഈ വിമാനക്കമ്പനികളാകട്ടെ റൂട്ടുകൾ തിരികെ നൽകാനും തയാറാകുന്നില്ല. രണ്ട് മാസത്തിനുള്ളിൽ സർവിസ് പുനരാരംഭിക്കാനുള്ള ശ്രമത്തിലാണ് ജെറ്റ് എയർവേസ്​​ അധികൃതർ.