തൊഴിലാളികളുടെ മരണം: 'ഈസ് ഓഫ് ഡൂയിങ്​ ബിസിനസ്' ആണെന്ന് എ.ഐ.യു.ടി.യു.സി

തൃപ്പൂണിത്തുറ: കളമശ്ശേരി കിൻഫ്ര പാർക്ക് ഇലക്​ട്രോണിക്സ് സിറ്റിയിൽ കെട്ടിട നിർമാണത്തിനിടെ നാല്​ തൊഴിലാളികൾ മണ്ണിനടിയിൽപ്പെട്ട്​ മരിച്ച സംഭവത്തിനുപിന്നിൽ, സർക്കാറിന്റെ കൊട്ടിഗ്​ഘോഷിക്കപ്പെടുന്ന 'ഈസ് ഓഫ് ഡൂയിങ്​ ബിസിനസ്' ആണെന്ന് എ.ഐ.യു.ടി.യു.സി സംസ്ഥാന കമ്മിറ്റി കുറ്റപ്പെടുത്തി. സർക്കാറിന്റെ മത്തുപിടിച്ച നിക്ഷേപസൗഹൃദനയം കാരണം ഇത്തരം സ്ഥാപനങ്ങളുടെ നിർമാണപ്രവൃത്തികളിൽപോലും നിയമപരമായി പാലിക്കേണ്ട സുരക്ഷാനിബന്ധനകളോ മുൻകരുതലുകളോ പാലിക്കപ്പെടുന്നില്ല. ഇക്കാര്യങ്ങൾ ഉറപ്പാക്കേണ്ട ലേബർ എൻഫോഴ്​സ്​മെന്റിനെപോലും സർക്കാർ നിർവീര്യമാക്കി. ചങ്ങാത്ത മുതലാളിത്തത്തിൽ നിലയുറപ്പിച്ച സർക്കാർ തൊഴിലാളികളുടെ ജീവനും തൊഴിലിടങ്ങളിലെ സുരക്ഷക്കും ഒരുവിലയും കൽപിക്കുന്നില്ലെന്നും എ.ഐ.യു.ടി.യു.സി പ്രസ്താവനയിൽ ചൂണ്ടിക്കാട്ടി. മരണപ്പെട്ട നാലുപേരുടെ കുടുംബത്തിന് 10 ലക്ഷം രൂപ വീതവും പരിക്കു പറ്റിയവർക്ക് അഞ്ച്​ ലക്ഷം രൂപ വീതവും അടിയന്തര സഹായമായി സർക്കാർ നൽകണമെന്ന് യൂനിയൻ ആവശ്യപ്പെട്ടു.