കൊക്കയിൽ വീണ്​ വിനോദസഞ്ചാരി മരിച്ചു

അടിമാലി: വിനോദ സഞ്ചാരത്തിനെത്തിയ ആൾ മാങ്കുളം പെരുമന്‍കുത്ത് വെള്ളച്ചാട്ടത്തിന്​ സമീപത്തെ കൊക്കയിൽ വീണ്​ മരിച്ചു. കാലടി കാഞ്ഞൂര്‍ പാറപ്പുറം സ്വദേശി വെളുത്തേപ്പിള്ളി ജോഷിയാണ്​ (49) മരിച്ചത്. വെള്ളച്ചാട്ടത്തിന് മുകളില്‍നിന്ന്​ കാല്‍വഴുതി കൊക്കയിൽ വീണാണ് അപകടം. ജോഷി ഉള്‍പ്പെടുന്ന ഒമ്പതംഗ സംഘമാണ്​ മാങ്കുളത്ത് എത്തിയത്. വെള്ളച്ചാട്ടത്തിന്റെ താഴെ ഭാഗത്ത്​ പാറക്കെട്ടുകള്‍ നിറഞ്ഞ വലിയ കൊക്കയാണ്. ജോഷി വെള്ളച്ചാട്ടത്തിന് മുകളില്‍നിന്ന്​ ഈ ഭാഗത്തേക്ക്​ കാല്‍ വഴുതി വീഴുകയായിരുന്നു. വീഴ്ചയുടെ ആഘാതത്തില്‍ തലയിൽ ഉൾപ്പെടെയുണ്ടായ ആഴത്തിലെ മുറിവാണ്​ മരണകാരണം. സമീപവാസികള്‍ ഉടൻ വെള്ളച്ചാട്ടത്തിന് അരികിലൂടെ കൊക്കയിലിറങ്ങി ശ്രമകരമായി ജോഷിയെ മുകളില്‍ എത്തിച്ചെങ്കിലും മരിച്ചു. മൃതദേഹം അടിമാലി താലൂക്ക്​ ആശുപത്രി മോര്‍ച്ചറിയിൽ. ജോഷി മലയാറ്റൂർ റോഡിലെ ആര്യവൈദ്യശാല ജീവനക്കാരനാണ്. ഭാര്യ: ബീന (ഐസ്ക്രീം ഫാക്ടറി ജീവനക്കാരി). മക്കൾ: അഭിനവ്, നവീൻ (വൈദികവിദ്യാർഥി, വയനാട്). സംസ്കാരം തിങ്കളാഴ്ച കാഞ്ഞൂർ പാറപ്പുറം സെന്‍റ്​ ജോസഫ് പള്ളി സെമിത്തേരിയിൽ. ഏതാനും ദിവസം മുമ്പ് മാങ്കുളം ആനക്കുളം വല്യപാറക്കുട്ടിയില്‍ വിനോദസഞ്ചാരത്തിനെത്തിയ പി.ജി വിദ്യാർഥി മുങ്ങിമരിച്ചിരുന്നു. idg adi 4 Joshi adimali ചിത്രം: ജോഷി