നിത്യസഹായ മാതാവിന്റെ ആദ്യദേവാലയം ചാത്തമ്മക്ക്​ സ്വന്തം

(പടം) നിത്യസഹായ മാതാവിന്റെ നാമത്തില്‍ സ്ഥാപിക്കപ്പെട്ട ഇന്ത്യയിലെ ആദ്യ ദേവാലയമാണ് എറണാകുളം-അങ്കമാലി അതിരൂപതയിലെ ചാത്തമ്മ എന്ന കൊച്ചു ദ്വീപിലുള്ളത്​. കുമ്പളം പഞ്ചായത്തിലെ ചാത്തമ്മ-ചേപ്പനം ദ്വീപുകളുടെ മധ്യഭാഗത്ത്​ കൈതപ്പുഴ കായലിന്റെ തീരത്താണ് ദേവാലയം. ആദ്യകാലങ്ങളില്‍ ഈ പ്രദേശത്തെ ക്രൈസ്തവര്‍ പുതിയകാവ്, കുമ്പളം, പനങ്ങാട് പള്ളികളിലെ ഇടവകക്കാരായിരുന്നു. ആത്മീയ കാര്യങ്ങള്‍ക്കായി ഈ പള്ളികളെയാണ് ആശ്രയിച്ചിരുന്നത്. ഈ കാലയളവില്‍ പുതിയകാവ് പള്ളിയിലെ പ്രോ വികാരിയായിരുന്ന മോണ്‍. ജോസഫ് പൈനുങ്കല്‍ ദേശവാസികളുടെ ക്ലേശങ്ങള്‍ മനസ്സിലാക്കി ശാശ്വതപരിഹാരമെന്ന നിലയില്‍ ചാത്തമ്മയില്‍ പള്ളി സ്ഥാപിക്കാൻ​ മുന്‍കൈയെടുത്ത്​. അദ്ദേഹം റോമിലുണ്ടായിരുന്ന സമയത്ത്​ മാതാവിന്റെ അത്ഭുത ചിത്രം റിഡംപ്റ്ററിസ്റ്റ് വൈദികരുടെ ജനറലേറ്റില്‍നിന്ന്​ ലഭിച്ചിരുന്നു. ഇത് പുതിയകാവ് പള്ളിയിലാണ് സൂക്ഷിച്ചിരുന്നത്. ചാത്തമ്മയില്‍ പുതുതായി നിര്‍മിക്കാനുദ്ദേശിക്കുന്ന പള്ളി നിത്യസഹായ മാതാവിന്റെയും വി. അല്‍ഫോന്‍സസ് ലിഗോരിയുടെയും നാമത്തിലാക്കാനും പ്രസ്തുത ചിത്രം ഇവിടെ പ്രതിഷ്ഠിക്കാനും അദ്ദേഹം തീരുമാനിച്ചു. 1924ല്‍ അന്നത്തെ കൊച്ചി സംസ്ഥാനത്തിൽ ദിവാന്‍ പേഷ്‌കാര്‍ ആയിരുന്ന കസ്തൂരിരംഗ അയ്യരില്‍നിന്ന്​ പ്രദേശത്ത് പള്ളി പണിയുന്നതിന് അനുമതി വാങ്ങി. പള്ളി സ്ഥാപിക്കുന്നതിന്​ ജോസഫ് പൈനുങ്കല്‍ മറ്റുള്ളവരോടൊപ്പം ചേപ്പനം-ചാത്തമ്മ പ്രദേശത്തെ പല ഇടങ്ങളും സന്ദര്‍ശിച്ച്​ ഇപ്പോ​ഴത്തെ സ്ഥലം തെരഞ്ഞെടുക്കുകയായിരുന്നു. ആ വര്‍ഷംതന്നെ പള്ളി നിർമാണം ആരംഭിച്ച്​ ക്രൈസ്തവവിശ്വാസത്തിന്റെ പ്രതീകമായ കുരിശ് താൽക്കാലിക ഓല ഷെഡിലാണ് സ്ഥാപിച്ചത്. നവംബര്‍ 21ന്​ 12 വൈദികരുടെ അകമ്പടിയോടെ പുതിയകാവില്‍നിന്ന്​ ജലഘോഷയാത്രയായി മോണ്‍. പൈനുങ്കല്‍ റോമില്‍നിന്ന്​ കൊണ്ടുവന്ന് പുതിയകാവില്‍ സൂക്ഷിച്ച നിത്യസഹായ മാതാവിന്റെ ചിത്രം ഇതേ ഓലഷെഡില്‍ പ്രതിഷ്ഠിച്ചു. വെള്ളക്കെട്ടും ചളിയും നിറഞ്ഞ പ്രദേശമായിരുന്നതുകൊണ്ട് പള്ളിക്ക് ജീര്‍ണാവസ്ഥ സംഭവിച്ചതുമൂലം പുതിയ ദേവാലയം പണിയണമെന്ന ആഗ്രഹം ഇടവകജനങ്ങളില്‍ ഉണ്ടായി. ഈ സന്ദര്‍ഭത്തില്‍ 1993 ല്‍ ഇടവക സന്ദര്‍ശിച്ച എറണാകുളം-അങ്കമാലി അതിരൂപത സഹായ മെത്രാനായിരുന്ന മാര്‍ ജേക്കബ് മനത്തോടത്തിന്റെ ആഹ്വാനപ്രകാരം ദൈവാലയനിര്‍മാണത്തിനായി കമ്മിറ്റിക്ക് രൂപം നൽകി. ഇടവക അതിര്‍ത്തിയില്‍നിന്നും പുറത്തുനിന്നും പിരിവുകളിലൂടെ ധനസമാഹരണം ആരംഭിക്കുകയും ചെയ്തു. 1996 ല്‍ എറണാകുളം-അങ്കമാലി അതിരൂപത മെത്രാലീത്തയും മേജര്‍ ആര്‍ച് ഷപ്പുമായിരുന്ന കര്‍ദിനാൾ ആന്റണി പടിയറ അടിസ്ഥാന ശില ആശീര്‍വദിച്ച് നിര്‍മാണപ്രവര്‍ത്തനം ആരംഭിച്ചു. ഇവിടുത്തെ ദര്‍ശനത്തിരുനാളില്‍ അയല്‍പ്രദേശങ്ങളായ കുമ്പളം, പനങ്ങാട്, അരൂർ, നെട്ടൂര്‍, മരട്, തേവര, പൂണിത്തുറ, തൃപ്പൂണിത്തുറ, പുതിയകാവ്, ഉദയംപേരൂര്‍ തുടങ്ങിയ സ്ഥലങ്ങളില്‍നിന്ന്​ ധാരാളം ആളുകള്‍ പങ്കെടുക്കാറുണ്ട്. 1999 ലായിരുന്നു പള്ളിയുടെ പ്ലാറ്റിനം ജൂബിലി. 2002ല്‍ പള്ളിമേടയുടെയും പള്ളിയുടെയും നിര്‍മാണം പൂര്‍ത്തിയാക്കി. ആ വര്‍ഷത്തെ തിരുനാളിനോടൊപ്പം കര്‍ദിനാള്‍ മാര്‍ വര്‍ക്കി വിതയത്തില്‍ ദൈവാലയത്തിന്റെ ആശീര്‍വാദം നിര്‍വഹിച്ചു. 1939 ല്‍ ഐറിഷുകാരായ റിഡംപ്റ്ററിസ്റ്റ് വൈദികരാല്‍ നിത്യസഹായ മാതാവിനോടുള്ള ഭക്തി ഇന്ത്യയില്‍ പ്രചരിപ്പിച്ചു തുടങ്ങുന്നതിനു മുമ്പുതന്നെയാണ്​ 1924ല്‍ ആ നാമധേയത്തില്‍ ഭാരതത്തില്‍ ആദ്യദേവാലയം ചാത്തമ്മയില്‍ സ്ഥാപിതമായത്​. നിത്യസഹായ മാതാവിന്റെ നൊവേന എല്ലാ ശനിയാഴ്ചയും നടത്തിവരുന്നു.