ഭൂരഹിതർക്ക്​ ഭൂമി കണ്ടെത്തൽ: പുതിയ നയത്തിന്‍റെ അടിസ്ഥാനത്തിൽ ശ്രമം നടത്തുന്നതായി​ സർക്കാർ

കൊച്ചി: ചെങ്ങറ പാക്കേജ്​ പ്രകാരം ഇനിയും ഭൂമി ലഭിച്ചിട്ടില്ലാത്തവർക്ക്​ സർക്കാറിന്‍റെ പുതിയ ഭൂനയത്തിന്‍റെ അടിസ്ഥാനത്തിൽ വാസയോഗ്യമായ ഭൂമി കണ്ടെത്താൻ ശ്രമിക്കുകയാണെന്ന്​ സർക്കാർ ഹൈകോടതിയിൽ. പാട്ടക്കരാർ ലംഘിച്ചും കാലാവധി കഴിഞ്ഞും കൈവശം വെച്ചിരിക്കുന്ന സർക്കാർ ഭൂമി കണ്ടെത്തി തിരിച്ചുപിടിക്കാനുള്ള നടപടി തുടങ്ങി​. വിവിധ സർക്കാർ വകുപ്പുകളുടെ കീഴിലെ അധികഭൂമി കണ്ടെത്താനും ശ്രമിക്കുന്നുണ്ട്. പാട്ടക്കാലാവധി കഴിഞ്ഞ ഭൂമിയിൽനിന്ന് സ്ഥലം അനുവദിക്കാൻ സർക്കാറിന്‍റെ ഉന്നതതല തീരുമാനം വേണം. ഇതിന്‍റെ ഭാഗമായാണ്​ പുതിയ നയം സജീവ പരിഗണനയിലുള്ളത്​. സംസ്ഥാനത്ത്​ പുറമ്പോക്ക്​ ലഭ്യത കുറവായതിനാലാണ്​ പ്രത്യേക നയത്തിലൂടെ ഭൂമി കണ്ടെത്താൻ ശ്രമം നടക്കുന്നത്​. ​എന്നാൽ, നയത്തിന്​ അന്തിമ അംഗീകാരമായില്ല. ഇതിന്​ ദീർഘ നടപടിക്രമങ്ങൾ വേണ്ടതുണ്ട്​.​ ഈ സാഹചര്യത്തിൽ പാക്കേജ്​ നടപ്പാക്കുന്നതിന്​ കുറഞ്ഞത്​ ആറുമാസത്തെ സമയം വേണമെന്നും ലാൻഡ്​​ റവന്യൂ അസിസ്റ്റന്‍റ്​ കമീഷണർ അനു എസ്​. നായർ ഹൈകോടതിയിൽ സമർപ്പിച്ച സത്യവാങ്​മൂലത്തിൽ ആവശ്യപ്പെട്ടു. ഭൂരഹിതരായ ആദിവാസികൾക്കും ദലിത്​ വിഭാഗങ്ങൾക്കും ചെങ്ങറ ഭൂസമരത്തെത്തുടർന്ന് ഭൂമി നൽകാൻ 2010 ൽ സർക്കാർ ഉത്തരവിറക്കിയിട്ടും നടപ്പാക്കിയില്ലെന്നും വാസയോഗ്യമല്ലാത്ത ഭൂമിയാണ് നൽകുന്നതെന്നും ആരോപിക്കുന്ന ഒരുകൂട്ടം ഹരജികളിലാണ്​ വിശദീകരണം. ഹരജി ജസ്റ്റിസ്​ ദേവൻ രാമചന്ദ്രൻ ഈ മാസം​ 23ന്​ പരിഗണിക്കാൻ മാറ്റി. ഭൂമി നൽകാൻ ചുമതലപ്പെടുത്തിയ ഉദ്യോഗസ്ഥരുടെ വിശദാംശങ്ങളും ഗുണഭോക്താക്കൾക്ക്​ വാസയോഗ്യമായ സ്ഥലം നൽകാൻ കഴിയുന്ന സമയക്രമവും അറിയിക്കാൻ കഴിഞ്ഞ ജനുവരിയിൽ കോടതി നിർദേശിച്ചിരുന്നു. ഇതേതുടർന്നാണ്​ സത്യവാങ്​മൂലം സമർപ്പിച്ചത്​. ലാൻഡ്​​ ബോർഡിന്‍റെ കൈവശമുള്ള രജിസ്റ്റർ പ്രകാരം വിതരണത്തിന്​ യോഗ്യമായ 36.34 ഹെക്ടർ മിച്ച ഭൂമിയുള്ളതായാണ്​ സെക്രട്ടറി അറിയിച്ചതെങ്കിലും നേരിട്ടുള്ള വിശദമായ പരിശോധനയിൽ ഇത്​ 9.35 ഹെക്ടർ മാത്രമാണെന്ന്​ ബോധ്യമായതായി സത്യവാങ്​മൂലത്തിൽ പറയുന്നു. പത്തനംതിട്ടയിൽ 0.2098 ഉം തൃശൂരിൽ 4.9077ഉം കണ്ണൂരിൽ 4.2281 ഉം ഹെക്ടർ വീതമാണ്​ വാസയോഗ്യവും കൃഷിയോഗ്യവുമായി കണ്ടെത്തിയിട്ടുള്ളത്​. പാക്കേജ്​ നടപ്പാക്കാൻ അനുയോജ്യമായി നിലവിൽ ഇത്രയേ ലഭ്യമായിട്ടുള്ളൂ. കൊല്ലത്ത്​ സ്ഥലം ലഭ്യമല്ല. ഇടുക്കി ശാന്തൻപാറയിൽ 11 ഹെക്ടറും മലപ്പുറം എടയൂരിൽ​ 4.76 ഹെക്ടറും ലഭ്യമാണെന്ന്​ കലക്ടർമാർ അറിയിച്ചിട്ടുണ്ട്​. ഇവയിൽ സൗകര്യങ്ങളൊരുക്കാൻ കഴിയുമോയെന്ന്​ പരിശോധിക്കാനും തിരിച്ചുപിടിക്കാനും വിതരണത്തിനുമുള്ള സാധ്യതകൾ ആരായാനും നടപടി ആരംഭിക്കാനും കലക്ടർമാർക്ക്​ നിർദേശം നൽകിയിട്ടുണ്ട്​.