നഗര രാത്രികൾ സ്ത്രീ സൗഹൃദമാക്കാൻ പൊലീസ്​

കൊച്ചി: സ്ത്രീകൾക്ക്​ നിർഭയമായി നഗരത്തിൽ രാത്രികളിൽ ഇറങ്ങാനും കലാപരിപാടികൾ ആസ്വദിക്കാനും വഴിയൊരുക്കി സിറ്റി പൊലീസ്​. ഒപ്പം സ്വയം പ്രതിരോധ പാഠങ്ങളും നൽകുന്നുണ്ട്​. സിറ്റി പൊലീസ്​ കമീഷണർ നാഗരാജുവിന്‍റെ നേതൃത്വത്തിലാണ്​ വേറിട്ട പരിപാടികൾ. വനിത ദിനത്തിൽ രാത്രി ഏഴുമുതൽ പുലർച്ച ഒന്നുവരെ പരിപാടികൾ നീണ്ടു. പച്ചാളം ക്യൂൻസ്​ വാക്ക്​ വേ, ഫോർട്ട്​കൊച്ചി ബീച്ച്​, ഇൻഫോ പാർക്ക്​, കൊച്ചി സർവകലാശാല എന്നിവിടങ്ങളിലാണ്​ പരിപാടികൾ. പൊലീസ്​ ബാൻഡ്​​ സംഘത്തിന്‍റെ കലാപ്രകടനങ്ങൾ, സ്​റ്റേജ്​ പരിപാടികൾ, പ്രദർശനങ്ങൾ, സ്വയം പ്രതിരോധ ക്ലാസുകൾ, ടാ​ബ്ലോകൾ, വനിത കിയോസ്കുകൾ എന്നിവ സംഘടിപ്പിക്കുന്നുണ്ട്​. ബുധൻ, വ്യാഴം ദിവസങ്ങളിലും പരിപാടികൾ തുടരുമെന്നും സ്ത്രീകളുടെ പങ്കാളിത്തം കൂടുതലായി വേണമെന്നും കമീഷണർ അറിയിച്ചു.