നിഷയുടെ 'കൃഷികാര്യ'ത്തിലൂടെ നാടാകെ മാറി; ഹിറ്റായി സൂപ്പർമാർക്കറ്റും

ആലപ്പുഴ: കൃഷി മുഖ്യ ഇനമാക്കിയ ​ആലപ്പുഴ പാതിരപ്പള്ളിയിലെ നിഷയുടെ കൃഷികാര്യ 'സൂപ്പർമാർക്കറ്റ്​' സൂപ്പർഹിറ്റാണ്​. രണ്ട്​പതിറ്റാണ്ടായി നാടിനെ ജൈവകൃഷിരീതിയിലേക്ക്​ വഴിതെളിച്ചും വിത്തുപാകുന്നത്​ മുതൽ വിളവെടുക്കുന്നതു​വരെയുള്ള എല്ലാകാര്യത്തിലും കൂടെക്കൂടിയും ജൈവകൃഷിയുടെ പ്രചാരകയായി മാറിയ ആലപ്പുഴ കലവൂർ കാവ്യാലയത്തിൽ നിമിഷ സുരേഷിന്‍റെ (50) കൃഷി മാർക്കറ്റിന്​ പ്ര​ത്യേകതകൾ ​ഏറെയാണ്​. പ്രകൃതി​യെ തൊട്ടറിഞ്ഞ്​ മണ്ണിനെയും മനുഷ്യനെയും കോർത്തിണക്കി വനിതനേതൃത്വം നൽകുന്ന സൂപ്പർമാർക്കറ്റ്​ എന്നനിലയിൽ കേരളത്തിലെ കർഷകരുടെ ശ്രദ്ധാകേന്ദ്രമാണ്​. വാങ്ങുന്ന വിത്തുകൾക്ക്​ നൂറുശതമാനമാണ്​ ഗാരന്‍റി. വിത്തുകൾ കിളിർക്കാതെ നശിച്ചുപോയാൽ അതേഇനത്തിലെ പുതിയത്​ സൗജന്യമായി നൽകുമെന്നതാണ്​ സവിശേഷത. സാമ്പത്തിക നേട്ടത്തിനപ്പുറം സേവനത്തിനാണ്​ മുഖ്യപരിഗണന. കർഷകർ ഉൽപാദിപ്പിക്കുന്ന ഉൽപന്നം ഉയർന്നവിലയ്​ക്ക്​ വിൽക്കാനും സഹായിക്കും. ഇടപാടുകാരായ കർഷകരിൽനിന്ന്​ തന്നെയാണ്​​​ വിൽപനക്ക്​ ആവശ്യമായ വിത്തുകൾ വാങ്ങുന്നത്​. പഞ്ചായത്തുകൾ, കുടുംബശ്രീ, വിവിധ സംഘടനകൾ എന്നിവക്ക്​ സൗജന്യനിരക്കിലാണ്​ നൽകുന്നത്​. കാലാവസ്ഥവ്യതിയാനത്തിൽ കൃഷിക്കുണ്ടാകുന്ന മാറ്റം തിരിച്ചറിഞ്ഞ്​ ചില പൊടിക്കൈകളും ചികിത്സയും നടത്താറുണ്ട്​. 18 വർഷമായി കായ്ക്കാതിരുന്ന തെങ്ങ്​ കുലച്ചത്​ ഈ ജൈവപരിപാലനത്തിന്‍റെ നേർക്കാഴ്ചയാണ്​. ജീവനക്കാരില്ലാത്ത കടയിൽ സഹായിക്കാൻ കൂടെയുള്ളത്​ ഭർത്താവും മകനുമാണ്​. ജൈവകൃഷിയെ സഹായിക്കുന്ന സാധനങ്ങൾ മാ​ത്രമാണ്​ ഇവിടെ കിട്ടുക​. പച്ചക്കറിവിത്തുകൾ, ചെടികൾ, ഗ്രോ ബാഗുകൾ, വളം, കീടനാശിനി, കാര്‍ഷികസാമഗ്രികള്‍, കാര്‍ഷിക പുസ്തകങ്ങൾ എന്നിവയെല്ലാം ഒരുകുടക്കീഴിലെത്തിയതോടെ ദിനംപ്രതി കർഷകരുടെ കുത്തൊഴുക്കാണ്​. കോവിഡ്​ പിടിമുറുക്കിയ ലോക്​ഡൗൺ കാലത്ത്​ കടയിലെ മുഴുവൻ സാധനങ്ങളും വിറ്റുപോയ ചരിത്രവുമുണ്ട്​. മണ്ണഞ്ചേരി, ആര്യാട്​, മാരാരിക്കുളം തെക്ക്​ പഞ്ചായത്തുകളിലെ ആയിരത്തിലധികം കർഷകർ സൂപ്പർ മാർക്കറ്റിലെ സ്ഥിരം ഇടപാടുകാരാണ്​​. ഇതിനൊപ്പം കുട്ടനാട്​, അപ്പർകുട്ടനാട്​ മേഖലയിൽനിന്ന്​​ എത്തുന്നവരുമുണ്ട്​. 'ഹൈടെക്​' കൃഷിരീതികളറിയാനും കാർഷിക ആവശ്യങ്ങൾക്കും എത്തുന്ന മറ്റ്​ ജില്ലക്കാർക്ക്​ വാട്ട്​സ്​ ആപ്പിലൂടെയാണ്​ മാർഗനിർദേശം. ആദ്യമൊക്കെ നാട്ടുകാരാണ് കൃഷിരീതികളെക്കുറിച്ച്​ ചോദിച്ചറിയാൻ​ എത്തിയിരുന്നത്​. വീട്ടിലെ ജൈവകൃഷിയിൽനിന്ന്​ ഉൽപാദിപ്പിക്കുന്ന​ 'വിഷരഹിത പച്ചക്കറി' സൂപ്പര്‍മാർക്കറ്റിൽ എത്തിച്ചായിരുന്നു തുടക്കം. കൃഷിരീതികൾ ഹൈടെക്കിലേക്ക്​ ചുവടുമാറ്റിയപ്പോൾ കാർഷികപ്രശ്നങ്ങളും കാർഷിക ഉപകരണങ്ങൾക്കും​ ​വേണ്ടിയാണ്​ സമീപിച്ചത്​. അവയെല്ലാം ഒരുകുടക്കീഴിലാക്കി പരിഹാരം ക​ണ്ടെത്തിയാണ്​ 'വിജയഗാഥ' രചിച്ചത്​. കൃഷിയും കൃഷിരീതിയും അറിയാതെ വാങ്ങിക്കൊണ്ടുപോകുന്ന വിത്തുകൾ വിളവെടുത്തതും പാകത്തിൽ പന്തലിച്ചുനിൽക്കുന്നതുമായ നിരവധി ചിത്രങ്ങളുമായി സന്തോഷം പങ്കിടാൻ ഉപഭോക്താക്കൾ എത്താറുണ്ട്​. അറിവ്​ പകരുന്നതിനൊപ്പം കൃഷിവകുപ്പിന്‍റെ വിവിധ സെമിനാറുകളിൽ ക്ലാസെടുക്കുന്നുണ്ട്​. കഴിഞ്ഞ ലോക്​ഡൗൺ കാലത്താണ്​ ജൈവകൃഷിരീതികളിലേക്ക്​ കൂടുതൽപേർ സഹായം തേടിയെത്തിയത്​. അവർക്കായി കുറഞ്ഞനിരക്കിൽ ഒരുക്കിയ 'ജൈവശ്രീ' അടുക്കളത്തോട്ടം പദ്ധതി വൻവിജയമായിരുന്നു. കൃഷിക്ക് ആവശ്യമായ വിത്തും വളവും മറ്റ് ജൈവകീടനാശിനികളും നിറച്ച കിറ്റിലൂടെയാണ്​ ​നാടാകെ ഹരിതവിപ്ലവം തീർത്തത്​. കൃഷിയോട്​ താൽപര്യം പ്രകടിപ്പിച്ച്​ എത്തുന്നവരിൽ ഏറെയും പുരുഷന്മാരാണെന്ന്​ നിഷ 'മാധ്യമ'ത്തോട്​ പറഞ്ഞു. വീട്ടുവളപ്പിലെ പച്ചക്കറി കൃഷിയിൽപോലും സജീവമാകാതെ സ്​ത്രീകൾ മുഖംതിരിഞ്ഞുനിൽക്കുന്നതിൽ വിഷമമുണ്ട്​. പത്തനംതിട്ട വടശ്ശേരിക്കര സ്വദേശിനിയാണ്​. അച്ഛനും മുത്തശ്ശനും കൃഷിക്കാരാണ്​. അവർ ചെറുപ്രായത്തിൽ പകർന്നുനൽകിയ കൃഷിരീതികളുടെ നേരറിവാണ്​ വനിതസംരംഭകക്ക്​ കരുത്തായത്​. ചരിത്ര ബിരുദധാരിയാണെങ്കിലും ഇഷ്ടപ്പെട്ടത് കൃഷിയുടെ ഭൂമിശാസ്ത്രമാണ്. വിവാഹം കഴിഞ്ഞ് കുടുംബകാര്യങ്ങൾ നോക്കുന്നതിനിടെയാണ്​ ഭർത്താവിന്‍റെ പിന്തുണയിൽ​ കാർഷികവിപണന മേഖലയിലേക്ക്​ തിരിഞ്ഞത്​. പിന്നീടത്​ ജീവിതത്തിന്‍റെ ഭാഗമായി. തൃശൂർ മണ്ണുത്തി നൂപർ മാനുവേഴ്സ് ഇന്ത്യ പ്രൈവറ്റ്​ ലിമിറ്റഡ്​ കമ്പനിയിലെ മാർക്കറ്റിങ്​ മാനേജർ സുരേഷ്​കുമാർ ഭർത്താവും കാവ്യ സുരേഷ്​, കരുൺ എസ്​. നാഥ്​ എന്നിവർ മക്കളുമാണ്​. പി.എസ്​. താജുദ്ദീൻ APL krishi super market pathirapally ആലപ്പുഴ പാതിരപ്പള്ളിയിൽ വനിതസംരംഭക നിഷയുടെ കൃഷികാര്യ സൂപ്പർമാർക്കറ്റ്​ APL nisha suresh നിഷ സുരേഷ്​ APL nisha super market ആലപ്പുഴ പാതിരപ്പള്ളിയിലെ കൃഷികാര്യ സൂപ്പർമാർക്കറ്റിൽ നിഷ