പാലത്തിന്​ കുഴിച്ച കുഴിയിൽ ലോറി കുടുങ്ങി

മട്ടാഞ്ചേരി: ഫോർട്ട്​കൊച്ചി-മട്ടാഞ്ചേരി കരകളെ ബന്ധിപ്പിക്കുന്ന ചുങ്കം പാലത്തിന്‍റെ പുനർനിർമാണത്തിന്​ കുഴിച്ച കുഴിയിൽ ചരക്കുമായി വന്ന ലോറി കുടുങ്ങി. മണിക്കൂറുകൾ നീണ്ട പരിശ്രമത്തിനൊടുവിലാണ് ലോറി പുറത്തെടുത്തത്. മട്ടാഞ്ചേരി ബസാറിലേക്ക് ചരക്കുമായി ആന്ധ്രപ്രദേശിൽനിന്ന്​ വന്ന ലോറിയാണ് വലിയകുഴിയിൽ പെട്ടത്. കൊച്ചി സ്മാർട്ട് മിഷന്‍റെ നേതൃത്വത്തിലാണ് പാലത്തിന്‍റെ നവീകരണപ്രവർത്തനങ്ങൾ ആരംഭിച്ചത്. പാലത്തിന് കുഴികൾ എടുത്തശേഷം കഴിഞ്ഞ നാല് മാസമായി നിർമാണം നിലച്ചിരിക്കുകയാണ്. ഇതോടെ ഇരുകരക്കാരും ബുദ്ധിമുട്ടിലാണ്​. കുഴിയിൽ വീണുള്ള അപകടങ്ങളും പതിവാണ്​. പൊടിശല്യം മൂലം സമീപത്തെ വീട്ടുകാരും ദുരിതത്തിലായി. നിരവധി ജനകീയ സമരങ്ങളും നടന്നെങ്കിലും അധികൃതർക്ക് കുലുക്കമുണ്ടായില്ല. ഇതിനിടയിലാണ് ചൊവ്വാഴ്ച പുലർച്ച ചരക്കുമായെത്തിയ ലോറി കുഴിയിൽ കുടുങ്ങിയത്. ക്രെയിൻ ഉപയോഗിച്ച് ഉയർത്താൻ ശ്രമിച്ചെങ്കിലും നടന്നില്ല. പിന്നീട് ചരക്ക് മറ്റൊരു ലോറിയിലേക്ക് മാറ്റിയാണ് ലോറി ഉയർത്തിയത്.