വിസ്ഡം പുസ്തകമേള പെരുമ്പാവൂരിൽ

കൊച്ചി: വിസ്ഡം യൂത്ത് സംഘടിപ്പിക്കുന്ന നാലുദിവസത്തെ പുസ്തകമേള വ്യാഴാഴ്ച പെരുമ്പാവൂരിൽ ആരംഭിക്കും. വൈകീട്ട് 4.30ന് വിസ്ഡം പണ്ഡിതസഭ സംസ്ഥാന കാര്യവാഹക സമിതി അംഗവും ജില്ല പ്രസിഡൻറുമായ ശമീർ മദീനി പവിലിയൻ ഉദ്ഘാടനം ചെയ്യുമെന്ന്​ സംഘാടകർ വാർത്തസമ്മേളനത്തിൽ പറഞ്ഞു. സമ്മേളനം ഡീൻ കുര്യാക്കോസ് എം.പി ഉദ്ഘാടനം ചെയ്യും. മുജാഹിദ് ബാലുശ്ശേരി മുഖ്യപ്രഭാഷണം നടത്തും. വാർത്തസമ്മേളനത്തിൽ ശമീർ മദീനി, യൂത്ത് ഓർഗനൈസേഷൻ ജില്ല പ്രസിഡൻറ് യൂസഫ് സ്വലാഹി, പുസ്തകമേള ചെയർമാൻ പി.പി. സുലൈമാൻ, കൺവീനർ മുഹമ്മദ് ഹക്കീം എന്നിവർ പങ്കെടുത്തു.