റേഷൻ വിതരണ തീയതി നീട്ടണം -റാക്കോ

കൊച്ചി: നെറ്റ്​വർക്ക് ദുർബലമായതിനാലും സെർവർ തകരാറായതിനാലും കഴിഞ്ഞ ഒരാഴ്ച റേഷൻ വിതരണം പൂർണമായും അവതാളത്തിലായ സാഹചര്യത്തിൽ ഫെബ്രുവരിയിലെ റേഷൻ വിതരണ തീയതി നീട്ടണമെന്ന് റെസിഡന്‍റ്​സ്​ അസോസിയേഷൻ കോഓഡിനേഷൻ കൗൺസിൽ (റാക്കോ) സംസ്ഥാന കൗൺസിൽ യോഗം ആവശ്യപ്പെട്ടു. കോവിഡ് വാക്സിൻ രണ്ടാം ഡോസും ബൂസ്റ്റർ ഡോസും എടുക്കുന്നതിന് അസോസിയേഷൻവഴി ബോധവത്​കരണ ക്ലാസും സംസ്ഥാന ആരോഗ്യവകുപ്പ്​ സഹകരണത്തോടുകൂടി വാക്സിനേഷൻ ക്യാമ്പുകളും നടത്തുന്നതിനും യോഗം തീരുമാനിച്ചു. റാക്കോ സംസ്ഥാന പ്രസിഡന്‍റ്​ പി.ആർ. പത്മനാഭൻ നായർ അധ്യക്ഷത വഹിച്ചു. ഓൺലൈൻ യോഗത്തിൽ സംസ്ഥാന ജനറൽ സെക്രട്ടറി കുരുവിള മാത്യൂസ്, ഭാരവാഹികളായ അയ്യൂബ് മേലേടത്ത്, കുമ്പളം രവി, കെ.എസ്. ദിലീപ്കുമാർ, ജോൺ തോമസ്, മൈക്കിൾ കടമാട്ട് ജോയി പ്ലാത്തോട്ടം, ജീന ചെറിയാൻ, ബീന റസാഖ്​, സി.എസ്. പുഷ്പലത, ഗീത ബാലചന്ദ്രൻ, സോഫിയ ഷെറീഫ്, ഗഫൂർ ടി. മുഹമ്മദ് ഹാജി, ഷാജൻ ആന്‍റണി, ഏലൂർ ഗോപിനാഥ് എന്നിവർ സംസാരിച്ചു.