ചൂർണി ഭവനപദ്ധതിക്ക് ഇന്ന് തുടക്കമാകും

ചൂർണിക്കര: പഞ്ചായത്തി‍ൻെറ സ്വപ്ന പദ്ധതിയായ ചൂർണി ഭവന നിർമാണത്തിന് ഞായറാഴ്ച തുടക്കമാകും. ഭവനരഹിതരും നിർധനരുമായവർക്ക് വീട് നിർമിച്ച് നൽകുന്നതാണ് പദ്ധതി. അശോകപുരം മനക്കപ്പടിയിൽ ടാലൻറ് സ്​കൂളിന് സമീപം ജിമ്മി വർഗീസ് പെട്ട എന്ന വ്യക്തി പഞ്ചായത്തിന് സൗജന്യമായി നൽകിയ ഭൂമിയിലാണ് വീടുകൾ നിർമിക്കുന്നത്. സൻെറിന് അഞ്ചുലക്ഷം രൂപ വരെ മതിപ്പ് വിലയുള്ള 10 സെന്‍റ്​ സ്ഥലമാണ്‌ നൽകിയത്. ഒമ്പതാം വാർഡ് അംഗം സി.പി. നൗഷാദി‍ൻെറ അഭ്യർഥനയെത്തുടർന്നായിരുന്നു ഇത്​. പഞ്ചായത്ത് ഫണ്ട് ഉപയോഗിച്ച് ഘട്ടം ഘട്ടമായി നാല് ഇരുനില വീടുകൾ നിർമിക്കാനാണ് ലക്ഷ്യം. രാവിലെ 10ന്​ അൻവർ സാദത്ത് എം.എൽ.എ തറക്കല്ലിടും. ജിമ്മി വർഗീസ് പെട്ടയെ ജില്ല പഞ്ചായത്ത് പ്രസിഡൻറ് ഉല്ലാസ് തോമസ് ആദരിക്കും. വാഴക്കുളം ബ്ലോക്ക് പഞ്ചായത്ത് പ്രസിഡൻറ് അൻവർ അലി മുഖ്യാതിഥിയായിരിക്കും. പഞ്ചായത്ത് പ്രസിഡൻറ് രാജി സന്തോഷ് അധ്യക്ഷത വഹിക്കും.