പള്ളുരുത്തി വെളി മൈതാനത്ത് താൽക്കാലിക വേലി നിർമിക്കാൻ അനുമതി

കൊച്ചി: അന്യ വാഹനങ്ങളുടെ പാർക്കിങ്​ തടയാൻ പള്ളുരുത്തി ശ്രീഭവാനീശ്വര ക്ഷേത്രത്തിന് മുന്നിലെ വെളി മൈതാനത്ത് താൽക്കാലിക വേലി നിർമിക്കാൻ എസ്.ഡി.പി.വൈ സ്കൂളിന്​ ഹൈകോടതിയുടെ അനുമതി. സ്കൂളിലെ വിദ്യാർഥികളുടെ കളി സ്ഥലമായി ഉപയോഗിക്കാൻ നൽകിയ അനുമതി വാഹന പാർക്കിങിന്​ പോലും ദുരുപയോഗം ചെയ്യുന്നതായി ചൂണ്ടിക്കാട്ടി ശ്രീധർമ പരിപാലന യോഗത്തിന്​ വേണ്ടി പ്രസിഡന്‍റ്​ സി.ജി. പ്രതാപൻ നൽകിയ ഹരജിയാണ്​ ജസ്റ്റിസ്​ എൻ. നഗരേഷ്​ പരിഗണിച്ചത്​. കെട്ടിട നിർമാണത്തിന്​ അനുവദിക്കരുതെന്നതടക്കം ഉപാധികളോടെ സ്കൂളിലെ വിദ്യാർഥികളുടെ കളി സ്ഥലമായി വെളി മൈതാനം ഉപയോഗിക്കാൻ നേരത്തേ അനുമതി നല്കിയിരുന്നെങ്കിലും എല്ലാവരും മൈതാനം ഉപയോഗിക്കുന്ന സ്ഥിതിയാണുള്ളതെന്നാണ്​ ഹരജിയിലെ ആരോപണം. കോടതി നിർദേശമുണ്ടായിട്ടും ഒട്ടേറെ വാഹനങ്ങളും ഇവിടെ അനധികൃതമായി പാർക്ക്​ ചെയ്യുന്നു. കുട്ടികൾക്കായി അനുവദിച്ച സ്ഥലത്ത് ഇത് അനുവദിക്കാനാകില്ലെന്ന് കോടതി ചൂണ്ടിക്കാട്ടി. തുടർന്നാണ് മൈതാനത്തിന് ചുറ്റും താൽക്കാലിക വേലി നിർമിക്കാൻ അനുമതി നൽകിയത്​. വിദ്യാർഥികൾക്ക്​ സൗകര്യപ്രദമായ സ്ഥലത്ത്​ ഗേറ്റും സ്ഥാപിക്കാം. സമീപത്തെ മാർക്കറ്റിൽനിന്ന്​ മാലിന്യം കൊണ്ടു പോകാനുള്ള വാഹനം കയറ്റി വിടാൻ കൊച്ചി കോർപറേഷൻ ആവശ്യമുന്നയിച്ചാൽ അനുവദിക്കാൻ കോടതി നിർദേശിച്ചു. സ്കൂൾ സമയം അല്ലാത്തപ്പോൾ മാത്രമേ ഈ വാഹനം മൈതാനത്ത് പ്രവേശിപ്പിക്കാൻ അനുവദിക്കാവൂവെന്ന്​ വ്യക്​തമാക്കിയ കോടതി ഹരജി വീണ്ടും മാർച്ച്​ 10ന്​ പരിഗണിക്കാൻ മാറ്റി.