'പെൻഷൻ ഫണ്ട് തുടങ്ങണമെന്ന ഉത്തരവ് പിൻവലിക്കണം'

കളമശ്ശേരി: സർവകലാശാല ജീവനക്കാർക്ക് പെൻഷൻ ഫണ്ട് തുടങ്ങണമെന്ന ഉത്തരവ് അടിയന്തരമായി പിൻവലിക്കണമെന്ന് ഫെഡറേഷൻ ഓഫ് ഓൾ കേരള യൂനിവേഴ്സിറ്റി എംപ്ലോയീസ് ഓർഗനൈസേഷൻ ആവശ്യപ്പെട്ടു. സർവകലാശാല ജീവനക്കാർക്ക് ആരംഭിക്കുന്ന പെൻഷൻഫണ്ട് സർവകലാശാലകളെ അസ്ഥിരപ്പെടുത്തുക മാത്രമല്ല, ലക്ഷക്കണക്കിന് പാവപ്പെട്ട വിദ്യാർഥികൾക്ക് പഠനച്ചെലവ് കൂടുന്നതിനിടയാക്കും. അതിനാൽ ബന്ധപ്പെട്ട ഉത്തരവ് പിൻവലിക്കണം. ഈ ആവശ്യം ഉന്നയിച്ച് ബുധനാഴ്ച കേരളത്തിലെ എല്ലാ സർവകലാശാലകളിലും പ്രതിഷേധം നടത്തുമെന്ന് ഓർഗനൈസേഷൻ നേതാക്കൾ പറഞ്ഞു.