കിണറ്റിലെ പാറ പൊട്ടിക്കുന്നതിനിടെ തൊഴിലാളി മരിച്ചു

വടശ്ശേരിക്കര: കിണർ നിര്‍മാണത്തിന്​ പാറ പൊട്ടിക്കുന്നതിനിടെ അപകടത്തിൽപെട്ട് തൊഴിലാളി മരിച്ചു. പെരുനാട് മാടമണ്‍ പാലാഴി വീട്ടില്‍ കൃഷ്ണകുമാറാണ്​ (ഷിബു-44) മരിച്ചത്. കക്കുടുമണ്‍ കാഞ്ഞിരക്കാട്ട് വസ്തുവിലെ കിണറ്റില്‍ പാറ പൊട്ടിക്കുന്നതിനിടെയായിരുന്നു അപകടം. ഞായറാഴ്ച വൈകീട്ട്​ മൂന്നോടെയാണ് സംഭവം. കിണറ്റിലെ പാറയില്‍ എടുത്ത കുഴിയില്‍ തോട്ട നിറച്ചശേഷം കരയിലേക്ക്​ കയറുന്നതിനിടെ പാറ പൊട്ടിയാണ് അപകടമെന്ന് പൊലീസ് പറഞ്ഞു. ഉടന്‍ ആശുപത്രിയിലെത്തിച്ചെങ്കിലും മരിച്ചു. മൃതദേഹം റാന്നിയിലെ സ്വകാര്യ ആശുപത്രി മോര്‍ച്ചറിയില്‍. അവിവാഹിതനാണ്. പെരുനാട് പൊലീസ് കേസെടുത്തു.