അനധികൃത മണ്ണെടുപ്പ് തടയാൻ നടപടി സ്വീകരിക്കും: ജില്ല ഭരണകൂടം

കാക്കനാട്: മണ്ണെടുപ്പുമായി ബന്ധപ്പെട്ട നിയമങ്ങൾ ദുരുപയോഗം ചെയ്യുന്നുണ്ടോയെന്ന് പരിശോധിക്കുമെന്ന് എറണാകുളം കലക്ടർ ജാഫർ മാലിക്. ജില്ലയിൽ അനധികൃതമായി നടക്കുന്ന മണ്ണെടുപ്പ് തടയുന്നതിന്റെ ഭാഗമായാണ് തീരുമാനം. ഇതിന്​ പ്രത്യേക യോഗം ചേർന്ന് തുടർനടപടി തീരുമാനിക്കുമെന്നും ഓൺലൈനായി ചേർന്ന ജില്ല വികസന സമിതി യോഗത്തിൽ കലക്ടർ വ്യക്തമാക്കി. പിറവം മണ്ഡലത്തിൽ നിയമവിരുദ്ധ മണ്ണെടുപ്പ് പ്രവർത്തനങ്ങൾ വ്യാപകമാണെന്ന്​ യോഗത്തിൽ അനൂപ് ജേക്കബ് എം.എൽ.എ ആരോപിച്ചു. നഗരത്തിലെ അനധികൃത തെരുവോര കച്ചവടങ്ങൾക്കെതിരെ നടപടി സ്വീകരിക്കണമെന്ന്​ ടി.ജെ. വിനോദ് എം.എൽ.എ ആവശ്യപ്പെട്ടു. അനുവദിച്ചിരിക്കുന്ന സ്ഥലത്തെക്കാൾ കൂടുതൽ കൈയേറിയാണ് കടകൾ പ്രവർത്തിക്കുന്നുതെന്നും കാൽനടക്കാർക്ക് പലപ്പോഴും ഉപദ്രവമായി മാറുന്നതായും എം.എൽ.എ അഭിപ്രായപ്പെട്ടു. ചെല്ലാനത്തെ കുടിവെള്ള പ്രശ്നം പരിഹരിക്കുന്നതിന്​ ഇടപെടലുണ്ടാകണമെന്ന് കെ.ജെ. മാക്സി എം.എൽ.എ പറഞ്ഞു. മാത്യു കുഴൽനാടൻ എം.എൽ.എയുടെ ആവശ്യത്തെ തുടർന്ന് മൂവാറ്റുപുഴ-തേനി റോഡിൽ പുറമ്പോക്കുഭൂമി അളന്ന് തിട്ടപ്പെടുത്തുന്നതിന്​ പ്രത്യേക സംഘത്തെ നിയമിക്കുമെന്ന്​ കലക്ടർ അറിയിച്ചു. കോട്ടപ്പടി പഞ്ചായത്തിലെ പ്ലാമുടിയിലും സമീപ പ്രദേശങ്ങളിലും കവളങ്ങാട് പഞ്ചായത്തിലെ നീണ്ടപാറയിലും വന്യമൃഗശല്യം ഒഴിവാക്കാനുള്ള നടപടി സ്വീകരിക്കണമെന്ന്​ ആന്റണി ജോൺ എം.എൽഎ ആവശ്യപ്പെട്ടു. യോഗത്തിൽ എം.എൽ.എമാരായ പി.വി. ശ്രീനിജിൻ, കെ.എൻ. ഉണ്ണികൃഷ്ണൻ, കെ.ബാബു, എൽദോസ് കുന്നപ്പിള്ളി, ജില്ല പ്ലാനിങ്​ ഓഫിസർ അനിത ഏല്യാസ് എന്നിവരും പങ്കെടുത്തു. മയക്കുമരുന്ന് വിൽപന, നിരീക്ഷണം ശക്തമാക്കും കാക്കനാട്: എറണാകുളം മണ്ഡലത്തിൽ മയക്കുമരുന്നിന്റെയും മറ്റു ലഹരി വസ്തുക്കളുടെയും വിൽപന തടയുന്നതിന്​ രാത്രികാല പട്രോളിങ്​ ശക്തമാക്കിയതായി ജില്ല വികസന സമിതി യോഗത്തിൽ ഡെപ്യൂട്ടി എക്സൈസ് കമീഷണർ അറിയിച്ചു. വിവിധ കോളനികൾ, കെ.എസ്.ആർ.ടി.സി ബസ് സ്റ്റാൻഡ്​, പാർക്കിങ്​ ഏരിയകൾ എന്നിവിടങ്ങളിലും രാത്രികാല നിരീക്ഷണം നടത്തും. മയക്കുമരുന്ന് വ്യാപനം തടയാനും കേസുകൾ കണ്ടെത്താനും പിടികൂടുന്നതിനുമായി നാർകോട്ടിക് സെല്ലിന്റെ കീഴിൽ ഒരു പൊലീസ് ഇൻസ്​പെക്ടറും 14 പൊലീസുകാരും ഉൾപ്പെട്ട വിഭാഗം പ്രവർത്തിച്ചു വരുന്നുണ്ട്. കൊച്ചി പൊലീസ് കമീഷണറേറ്റിന്റെ പരിധിയിൽ ലഹരി ഉപയോഗങ്ങൾക്കെതിരെ അഞ്ചിൽ കൂടുതൽ കേസുകൾ രജിസ്റ്റർ ചെയ്ത 27 സ്ഥലം രജിസ്റ്റർ ചെയ്ത് പ്രത്യേകം നിരീക്ഷിച്ചുവരുന്നതായി കൊച്ചി സിറ്റി പൊലീസും യോഗത്തിൽ അറിയിച്ചു.