ഗോത്രഭാഷകളിൽനിന്ന്​ ബാലസാഹിത്യം; ശിൽപശാല ഇന്നുകൂടി

കൊച്ചി: കേരളത്തിലെ ഗോത്രഭാഷകളിൽനിന്ന്​ ബാലസാഹിത്യ കൃതികൾ പുസ്​തകമാക്കുന്നതി‍‍ൻെറ ഭാഗമായി ശിൽപശാല തുടങ്ങി. നാഷനൽ ബുക്ക് ട്രസ്റ്റ് ഇന്ത്യയാണ്​ പുസ്തക രചന പൂർത്തിയാക്കി പ്രസിദ്ധീകരിക്കുന്നത്​. സംസ്ഥാനത്ത്​ ആദ്യമായാണ്​ ഇത്തരം ശ്രമം. 2019ൽ കോഴിക്കോട്ട്​​ നടത്തിയ ആദ്യ ശിൽപശാലയുടെ തുടർച്ചയായാണ്​ എറണാകുളം വൈ.എം.സി.എ ഹാളിൽ നടക്കുന്നത്​. ശിൽപശാല ചൊവ്വാഴ്ചയും തുടരും. ശിൽപശാല എൻ.ബി.ടി എക്സിക്യൂട്ടിവ് അംഗം ഇ.എൻ. നന്ദകുമാർ ഉദ്ഘാടനം ചെയ്തു. കുറുമ്പ, കുറിച്യ, ഊരാളി, ബെട്ടക്കുറുമ, കാട്ടുനായ്ക്കൻ, പണിയ, തച്ചനാടൻ മൂപ്പൻ, പതിനായ്ക എന്നീ ഗോത്രഭാഷകളിലാണ് പുസ്തകങ്ങൾ തയാറാക്കുന്നത്. ഈ ഭാഷകളിൽ പ്രസിദ്ധീകരിക്കപ്പെടുന്ന ആദ്യ പുസ്തകങ്ങളാകും ശിൽപശാലയിൽ തയാറാക്കുക. പുതിയ വിദ്യാഭ്യാസ നയത്തിന്റെ ഭാഗമായി ദ്വിഭാഷ പുസ്തകങ്ങൾ പ്രസിദ്ധീകരിക്കാനുള്ള പദ്ധതിയുടെ ഭാഗമാണിത്. കനകശ്രീ പുരസ്‌കാര ജേതാവ് കവി ഡി. അനിൽകുമാർ, ഗോത്ര ഭാഷാ കവി ധന്യ വേങ്ങച്ചേരി എന്നിവരുടെ നേതൃത്വത്തിലാണ് ശില്പശാല.