ലോട്ടറി മോഷണം പ്രതി പിടിയിൽ

കോതമംഗലം: കോതമംഗലത്ത് ലോട്ടറിക്കട കുത്തിത്തുറന്ന് മോഷണം നടത്തിയ കേസിൽ ഒരാൾ അറസ്റ്റിൽ. പാലാ സ്വദേശി ഉറുമ്പിൽ ബാബു ഏലിയാസിനെയാണ് (56) കോതമംഗലം പൊലീസ് അറസ്റ്റ് ചെയ്തത്. കഴിഞ്ഞ നവംബർ 12ന് രാത്രിയാണ്​ കോതമംഗലം താലൂക്ക് ആശുപത്രിക്ക് സമീപമുള്ള ജെ.ജെ ലോട്ടറിക്കടയുടെ പിൻവാതിൽ കുത്തിപ്പൊളിച്ച്​ പ്രതി അകത്തുകടന്നത്. 80,000 രൂപയിൽപരം വിലമതിക്കുന്ന 2,200 ലോട്ടറിയാണ് മോഷണംപോയത്. എതാനും ലോട്ടറി ടിക്കറ്റുകൾ സമ്മാനാർഹമായിരുന്നു. എല്ലാ ലോട്ടറിക്കടകളിലും മോഷണം പോയ ടിക്കറ്റിന്‍റെ നമ്പർ നൽകിയിരുന്നു. സമ്മാനാർഹമായ ടിക്കറ്റ് പാലായിലെ കടയിൽ പ്രതി മാറാൻ ചെല്ലുകയും സി.സി ടി.വിയിൽ ദൃശ്യം പതിയുകയും ചെയ്തിരുന്നു. ഇതിനിടെ പ്രതിയെ മാറ്റൊരു കേസിൽ കാഞ്ഞിരപ്പിള്ളി പൊലീസ് അറസ്റ്റ് ചെയ്യുകയും കോതമംഗലം പൊലീസ് സ്ഥലത്തെത്തി പ്രതിയെ തിരിച്ചറിയുകയുമായിരുന്നു. മോഷണം നടന്ന കടയിൽ പ്രതിയെ എത്തിച്ച് തെളിവെടുപ്പ് നടത്തി.