വനിത കൗൺസിലർമാർ പരാതി നൽകി

മൂവാറ്റുപുഴ: നഗരസഭ ഹാളിൽ ക്രിസ്മസ് ആഘോഷം സംഘടിപ്പിച്ചതുമായി ബന്ധപ്പെട്ട് എടുത്ത ദൃശ്യങ്ങൾ ചേർത്ത് അപകീർത്തികരമായ പ്രചാരണം നടത്തിയെന്ന് പരാതി. സമൂഹ മാധ്യമങ്ങളിലൂടെ പ്രചാരണം നടത്തിയെന്ന് ആരോപിച്ച് വനിത കൗൺസിലർമാർ ഉൾപ്പെടെയുള്ളവരാണ് പൊലീസിൽ പരാതി നൽകിയത്. പി.ടി. തോമസിന്‍റെ മരണത്തെത്തുടർന്ന് കോൺഗ്രസ് പ്രഖ്യാപിച്ച ദുഃഖാചരണം തള്ളി കോൺഗ്രസ് കൗൺസിലർമാരുടെ നേതൃത്വത്തിൽ നഗരസഭ കൗൺസിൽ ഹാളിൽ ക്രിസ്മസ് ആഘോഷം സംഘടിപ്പിച്ചിരുന്നു. നഗരസഭ ചെയർമാനും വൈസ് ചെയർപേഴ്സനും ഉൾപ്പെടെ എല്ലാവരും ഇതിൽ പങ്കെടുത്തു. ആഘോഷങ്ങളിൽ പാട്ടുപാടുന്നതും ഡാൻസ് ചെയ്യുന്നതുമെല്ലാം കൗൺസിലർമാർതന്നെ പകർത്തി പുറത്തു വിട്ടതോടെയാണ് സംഭവം വിവാദമായത്.