കലക്​ഷനില്ല; കെ.എസ്.ആർ.ടി.സി തുരുത്ത് സർവിസ് പൂർണമായും ഒഴിവാക്കി

ആലുവ: രണ്ടുവർഷത്തെ ഇടവേളക്കുശേഷം പുനഃസ്ഥാപിച്ച ആലുവ-തുരുത്ത് കെ.എസ്.ആർ.ടി.സി ബസ് സർവിസ് വീണ്ടും നിർത്തി. കലക്​ഷനില്ലാത്തതിനാലാണ് ഒരുമാസം കൊണ്ട് ഓട്ടം നിർത്തിയത്. രാവിലെയും വൈകീട്ടുമായി മൂന്ന് ട്രിപ്പുകളാണ് ഉണ്ടായിരുന്നത്. തുരുത്ത് റെയിൽവേ നടപ്പാലം അറ്റകുറ്റപ്പണികൾക്ക്​ അടച്ചതിനെതുടർന്നാണ് വീണ്ടും സർവിസ് ആരംഭിച്ചത്. എന്നാൽ, സർവിസ് ലാഭകരമായി നടത്തുന്നതിനുള്ള യാത്രക്കാർ ഉണ്ടായിരുന്നില്ല. പാലത്തെ ആശ്രയിച്ചിരുന്ന ജോലിക്കാരായ സ്ത്രീകളാണ് പ്രധാനമായും കയറിയിരുന്നത്. പലപ്പോഴും 50 രൂപയൊക്കെയായിരുന്നു വരുമാനം. ഇതേതുടർന്ന് ആദ്യം ട്രിപ്പുകളുടെ എണ്ണം കുറച്ചു. എന്നിട്ടും മാറ്റമില്ലാതെ വന്നതോടെ പൂർണമായും ഒഴിവാക്കുകയായിരുന്നു.