വസ്ത്രവ്യാപാര മേഖലയിലെ ജി.എസ്.ടി വർധന പിന്‍വലിക്കണം -കെ.ടി.ജി.എ

കൊച്ചി: വസ്ത്രവ്യാപാര മേഖലക്ക്​ ജി.എസ്.ടി അഞ്ച് ശതമാനത്തില്‍നിന്ന് 12 ശതമാനമാക്കിയത് പിന്‍വലിക്കണമെന്ന് കേരള ഗാര്‍മൻെറ്​സ്​ ആന്‍ഡ് ടെക്സ്‌റ്റൈല്‍ ഡീലേഴ്സ് വെല്‍ഫെയര്‍ അസോസിയേഷന്‍ (കെ.ടി.ജി.എ) സംസ്ഥാന കൗണ്‍സില്‍ യോഗം ആവശ്യപ്പെട്ടു. ഇതിന് കേന്ദ്രസര്‍ക്കാറില്‍ സമ്മര്‍ദം ചെലുത്താന്‍ കൊച്ചിയില്‍ ചേര്‍ന്ന യോഗം തീരുമാനിച്ചു. ജനങ്ങളുടെ കുടുംബ ബജറ്റിനൊപ്പം തകരുന്നത് ചെറുകിട ഇടത്തരം കച്ചവടക്കാരുടെ വ്യാപാരംകൂടിയാണ്. വിലവര്‍ധനക്കുപുറ​െമ ഉദ്യോഗസ്ഥ തേര്‍വാഴ്ചക്കും അഴിമതിക്കും ഈ വര്‍ധന വഴിയൊരുക്കുമെന്ന് യോഗം ചൂണ്ടിക്കാട്ടി. രണ്ടുവര്‍ഷത്തില്‍ ഏഴോ എട്ടോ ജനിതകമാറ്റം സംഭവിച്ച് ലോകത്തെ വിറപ്പിച്ച കോവിഡ് വൈറസിനെക്കാളും വലിയ മഹാമാരിയാണ് നാല്​ വര്‍ഷത്തിനുള്ളില്‍ 1200 മാറ്റം വരുത്തിയ ജി.എസ്.ടി. വസ്ത്രമേഖല ഇരുപതിലേറെ മൂല്യവര്‍ധിത ഘട്ടങ്ങളില്‍കൂടി കടന്നുപോകുന്നതിനാല്‍ അവസാനം പതിക്കുന്ന നികുതി 12 ശതമാനമെന്നത് ജനങ്ങളെ കൊള്ളയടിക്കുന്നതിനു തുല്യമാണ്. എം.എസ്.എം.ഇയില്‍ ഉള്‍പ്പെടുത്തി വ്യവസായങ്ങള്‍ക്ക് നല്‍കിവരുന്ന ഇളവുകള്‍ വ്യാപാരമേഖലക്കുകൂടി ബാധകമാക്കുക, കോവിഡ് ഒഴിയാത്ത സാഹചര്യത്തില്‍ വായ്​പ മൊറട്ടോറിയം പ്രഖ്യാപിക്കുക, ഓണ്‍ലൈന്‍ കുത്തകകള്‍ക്ക്് നിയന്ത്രണങ്ങള്‍ ഏര്‍പ്പെടുത്തുക, വ്യാപാരികള്‍ക്കുമാത്രമുള്ള പ്ലാസ്​റ്റിക് നിരോധനവും പിഴയും ഒഴിവാക്കുക തുടങ്ങിയ ആവശ്യങ്ങളും ഉന്നയിച്ചു. പ്രസിഡൻറ്​ ടി.എസ്. പട്ടാഭിരാമന്‍ യോഗം ഉദ്ഘാടനം ചെയ്തു. വര്‍ക്കിങ്​ പ്രസിഡൻറ്​ മുജീബ് റഹ്​മാന്‍ അധ്യക്ഷത വഹിച്ചു. ജനറല്‍ സെക്രട്ടറി കെ. കൃഷ്ണന്‍, ട്രഷറര്‍ എസ്. ബഷ്യാം (ബാബു), സംസ്ഥാന രക്ഷാധികാരി ശങ്കരന്‍കുട്ടി സ്വയംവര, വനിത വിങ് പ്രസിഡൻറ്​ ബീന കണ്ണന്‍, സംസ്ഥാന വൈസ് പ്രസിഡൻറുമാരായ ജൗഹര്‍ ടണ്‍ടാം, വിനോദ് മഹാലക്ഷ്മി, ബാപ്പു ചമയം, ഇക്ബാല്‍ പൂജ, ടി.എ. ശ്രീകാന്ത്, സജീവ് ഗായത്രി, ഷാനവാസ് റോയല്‍ തുടങ്ങിയവര്‍ സംസാരിച്ചു.