വിദേശജോലി വാഗ്ദാനംചെയ്ത്​ തട്ടിപ്പ്; പ്രതി അറസ്​റ്റില്‍

കൊച്ചി: വിദേശത്ത് ജോലി വാഗ്ദാനം ചെയ്ത്​ തട്ടിപ്പ് നടത്തിയ പ്രതി പിടിയില്‍. കൊടുങ്ങല്ലൂര്‍ വെള്ളംപത്ത് വീട്ടില്‍ ബാലകൃഷ്ണനെയാണ് (77) എറണാകുളം സെന്‍ട്രല്‍ പൊലീസ് അറസ്​റ്റ്​ ചെയ്തത്. വിദേശ ജോലിക്ക് ഉദ്യോഗാർഥികളെ കൊണ്ടുപോകാനുള്ള ലൈസന്‍സ് ഇല്ലാതെയായിരുന്നു കുമാര്‍ ട്രാവല്‍സ് എന്ന പേരില്‍ പ്രതി റിക്രൂട്ടിങ്​ സ്ഥാപനം നടത്തിയിരുന്നത്. കോവിഡ് വ്യാപനമായതിനാല്‍ വിദേശത്തേക്ക് ജോലിക്ക് ധാരാളം ഉദ്യോഗാർഥികളെ ആവശ്യമുണ്ടെന്ന രീതിയില്‍ പരസ്യം നല്‍കിയാണ് വ്യാപകമായി തട്ടിപ്പ് നടത്തിയിരുന്നത്​. പ്രതിക്കെതിരെ നിരവധിപേർ പരാതിയുമായി സെന്‍ട്രല്‍ പൊലീസിനെ സമീപിച്ചിട്ടുണ്ട്. എറണാകുളം സെന്‍ട്രല്‍ എ.സി.പി ജയകുമാര്‍, സെന്‍ട്രല്‍ സി.ഐ വിജയശങ്കര്‍, എസ്.ഐമാരായ ആനി ശിവ, ഫുള്‍ജന്‍ എന്നിവരുടെ നേതൃത്വത്തിലായിരുന്നു അന്വേഷണം.