ഫ്ലാറ്റ് സമുച്ചയത്തിന് ഡി.പി.ആർ; അംഗീകാരം നൽകി

മൂവാറ്റുപുഴ: സ്വന്തമായി വീടും സ്ഥലവും ഇല്ലാത്തവർക്ക്​ നഗരസഭ നിർമിച്ചു നൽകുന്ന ഫ്ലാറ്റ് സമുച്ചയത്തിന് ഡി.പി.ആർ തയാറാക്കുന്നതിന് മുനിസിപ്പൽ കൗൺസിൽ അംഗീകാരം നൽകി. സമ്പൂർണ പാർപ്പിട നഗരം എന്ന ലക്ഷ്യത്തോടെ നടത്തിവരുന്ന ഭവനനിർമാണത്തി​ൻെറ ഭാഗമായാണ് മുറിക്കല്ലില്‍ ഫ്ലാറ്റ് നിർമിക്കുന്നത്. 50 കുടുംബത്തെയാകും ഇവിടെ പുനരധിവസിപ്പിക്കുക. അര ഏക്കറിലധികം സ്ഥലത്ത് എങ്ങനെ മികച്ച പാർപ്പിട സമുച്ചയം നിർമിക്കാമെന്ന് വിശദ പഠനത്തിനും എസ്​റ്റിമേറ്റ് തയാറാക്കുന്നതിനുമാണ് നഗരസഭ ചെയർമാൻ പി.പി. എല്‍ദോസി​ൻെറ അധ്യക്ഷതയിൽ ചേർന്ന കൗൺസിൽ യോഗം അംഗീകാരം നൽകിയത്. നിലവിൽ ഈ സ്ഥലത്ത് പ്രവർത്തിക്കുന്ന പകൽവീട് നിലനിർത്താനുള്ള സാധ്യതയും പഠിക്കും. ഭവനപദ്ധതിയുടെ ഉന്നത ഉദ്യോഗസ്ഥർ സ്ഥലം സന്ദർശിച്ചു. ലൈഫ് മിഷനും നഗരസഭയും സംയുക്തമായി നിർമിക്കുന്ന ഫ്ലാറ്റ് സമുച്ചയത്തി​ൻെറ വിജയത്തിന്​ വ്യക്തികളെയും സംഘടനകളെയും സഹകരിപ്പിക്കുമെന്നും ചെയര്‍മാന്‍ വ്യക്തമാക്കി. ഇതിന് പുറമെ സ്വന്തമായി സ്ഥലമുള്ള 75 കുടുംബത്തിന്​ വീട് നിർമിക്കാനുള്ള തുക നഗരസഭ ലഭ്യമാക്കി. ഇവയുടെ നിർമാണം പുരോഗമിച്ചുവരുന്നു. ഒപ്പം സ്വന്തമായി സ്ഥലമില്ലാത്ത 50 പേർക്ക് ഭൂമി വാങ്ങുന്നതിന് രണ്ടര ലക്ഷം രൂപ വീതം നൽകും. ഇതിനുള്ള നടപടിക്രമം അവസാനഘട്ടത്തിലാണ്. നഗരസഭക്ക്​ പുറത്ത് പഞ്ചായത്ത് പ്രദേശങ്ങളിലും ഗുണഭോക്താവിന് സ്ഥലം വാങ്ങാം എന്ന പ്രത്യേകതയുമുണ്ട്.