സിൽവർ ലൈൻ: സാമൂഹികാഘാത പഠന സർവേ നിർത്തിയെന്ന്​ സർക്കാർ ഹൈകോടതിയിൽ

കൊച്ചി: സിൽവർലൈൻ പദ്ധതിയുടെ ഭാഗമായ സാമൂഹികാഘാത പഠന സർവേ നിർത്തിയെന്ന്​ സർക്കാർ ഹൈകോടതിയിൽ. പുതിയ വിജ്ഞാപനമുണ്ടാകുന്നതുവരെ സർവേ സംബന്ധിച്ച തുടർനടപടി ഉണ്ടാകില്ല. സിൽവർലൈൻ പദ്ധതിക്കായി സർവേ നടത്തുന്നതും കെ-റെയിൽ എന്നെഴുതിയ കല്ലുകൾ സ്ഥാപിക്കുന്നതും ചോദ്യംചെയ്ത് സമർപ്പിച്ച ഹരജികളിലാണ്​ സർക്കാറിന്‍റെ വിശദീകരണം. സർവേ നടത്താനുള്ള വിജ്ഞാപനത്തിന്റെ കാലാവധി അവസാനിച്ചിരിക്കുകയാണ്​. പദ്ധതിയുടെ ഡി.പി.ആറിനോ സാമൂഹികാഘാത പഠനത്തിനോ ഇതുവരെ അനുമതി നൽകിയിട്ടില്ലെന്ന്​ കേന്ദ്ര സർക്കാർ ആവർത്തിച്ചു. ഇക്കാര്യം രേഖപ്പെടുത്തിയ കോടതി ഹരജികൾ ആഗസ്റ്റ് 28ന്​ വീണ്ടും പരിഗണിക്കാൻ മാറ്റി.